Денес, на 8 октомври во Струмица се одржа првиот училишен Октоберфест – германски фестивал подготвен со многу труд, ентузијазам и љубов кон германската култура од учениците и наставниците од средните и основните училишта од општина Струмица.
Домаќин на настанот беше ООУ „Сандо Масев“ – Струмица, а свој огромен придонес дадоа и трите средни училишта „Јане Сандански“, „Никола Карев“ и „Димитар Влахов“, како и основните училишта „Видое Подгорец“ и „Герас Цунев“ – с. Просениково со свои претставници и учесници.
Како гости на настанот присуствуваа и ученици и наставници од училиштата од Кочани, Делчево, Пробиштип, како и претседателката на Здружението на наставници по германски јазик со ученици од ООУ„Кочо Рацин“- Прилеп. Посебна чест беше присуството на претставниците од Гете-институтот – Kristina Gasnower и Гордана Бабоска, како и од претставник од Централната служба за училишта во странство – Richard Purschwitz, кои ја поддржаа оваа прекрасна иницијатива. На настанот присуствуваа и претставници од Општина Струмица, од Одделението за образование, кои дадоа поддршка на учениците и наставниците во нивниот труд, како и бројни директори, наставници, ученици, родители и љубители на германската култура.
Со богата и пригодна програма, учениците успеаја на автентичен начин да ја доловат атмосферата на Октоберфест, да ја приближат германската култура и да покажат дека јазикот не е само граматика и вокабулар – туку има душа што се чувствува.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
