Поради граматички грешки и несоодветна транскрипција на англиски јазик, знаците и патоказите што беа поставени во Струмица од НУ Завод за заштита на спомениците на културата и Музеј – Струмица наидоа на остри реакции во јавноста. Граѓаните почнаа да споделуваат фотографии од таблите со забележаните грешки, кои се дел од проектот за набавка на туристичка сигнализација во општина Струмица.
Станува збор за проект со кој на повеќе локации во градот треба да бидат поставени вкупно 89 знаци и патокази што ќе водат до позначајните културно-историски споменици и археолошки локалитети. Договорот за изработка и поставување на сигнализацијата лани во ноември го доби скопската фирма „Виа Сигнал“. Таа била единствен понудувач на јавната набавка. Договорот е во вредност од 420.000 денари, односно околу 4.720 денари по патоказ.
Изведувачот работел според приложената техничка спецификација од страна на Заводот и Музеј – Струмица, во која биле наведени димензиите на патоказите, видот на писмото што треба да биде испишано на таблите, како и количините за испорака. Од Заводот и Музеј Струмица пак ни кажаа дека техничката документација, врз основа на која била распишана јавната набавка е дел од основен проект, изработен од друга фирма. Информираа дека таблите со грешки ќе бидат повлечени и заменети со нови.
„Сакаме да ја информираме јавноста дека овие пропусти не се резултат на работа или постапка на НУ Завод за заштита на спомениците на културата и Музеј – Струмица. Во интерес на точноста и коректното информирање, таблите со грешки ќе бидат повлечени и ќе бидат поставени нови табли во текот на следните денови. Им благодариме на граѓаните за разбирањето и на сите што укажаа на забелешките. Остануваме посветени на професионално и прецизно претставување на културното наследство и јавната сигнализација“, стои во објавата на Заводот и музеј Струмица.
Со проектот е предвидено поставување патокази кон манастирите „Св. Богородица Елеуса“ и „Св. Леонтиј“ во селата Вељуса и Водоча, црквите „Св. Петнаесет Тивериополски Свештеномаченици“ и „Св. Кирил и Методиј“ во Струмица, Средновековната црква, Спомен-костурницата над градот, Спомен-куќата на Благој Јанков Мучето, како и археолошките локалитети Мачук и Цареви Кули. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
