Во Градската галерија во Струмица во организација на амбасадата на Република Италија, Здружението на граѓани „Кво Вадис Ад Астра“ и општина Струмица, беше отворена изложба насловена како ,,„ПРЕДИЗВИК: Иновациите на италијанскиот дизајн во спортот“ на која можеа да се видат ретки, легендарни и современи спортски експонати.
На показ на јавноста беа изложени оригиналните копачки на еден од најдобрите италијански и светски фудбалери, Роберто Баџо, тркачкиот велосипед „Пинарело“ – победник на дури 16 изданија на Tour de France како и други спортски експонати од срцето на Италија што ја откриваат врската помеѓу креативноста, технологијата и движењето.
Изложбата ја отвори заменик градоначалничката на општина Струмица Елена Маѓеровска Паликарова, а присутните ги поздрави и амбасадорот на Република Италија во Република Северна Македонија, Н.Е Паоло Палминтери. Отворајќи ја изложбата Паликарова од нејзино и од името на градоначалникот Костадин Костадинов кој од објективни причини не можеше да присуствува на настанот, му го честиташе наименувањето на господинот Паоло Палминтери за нов италијански амбасадор, посакувајќи му успех во извршувањето на дипломатските задачи во нашава земја.
,, Изложбата е поддржана од MAECI и ADI – Италијанско здружение за индустриски дизајн. Изложбата ,,ПРЕДИЗВИК“ ни ги донесува иновациите на италијанскиот дизајн во спортот, претставувајќи го всушност спојот на спортот, дизајнот и италијанската страст – визуелно патување низ иновациите во спортскиот дизајн од 1960-тите до денес, како дел од патот кој води кон Зимските олимписки игри 2026 кои ќе се одржат во Милано и Кортина Дампецо“ рече Паликарова.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
