Во наколната населба во месноста Мрдаја во Дојран имало врвни занаетчии. Ова е констатацијата на тимот археолози предводен од Зоран Рујак од струмичкиот Завод и музеј откако таму деновиве беше пронајден праисториски сад со соларна декорација. Според Рујак ова е уникатен наод и на друго место ваков сад, досега не е откриен. Наколната населба во Стар Дојран веќе цела есен се истражува каде беа пронајдени голем број наоди и укажуваат дека таму имало развиена наколна населба од доцното бронзено време.
,,Се работи за фрагмент од праисториски сад, со соларна декорација, односно сонце со зраци. Ова е дел од поголема композиција на богато декориран сад, изработен од древните жители на наколната населба во месноста Мрдаја во Дојран, пред повеќе од 3200 години од денес. Се работи за виско развиена праисториска заедница, која имала врвни занаетчии со вешти мајсторски раце. Има уште многу фрагменти од богато декорирани садови со разноразни претстави што оваа населба ја прави една од најрепрезентативните од доцното бронзено време на север од егејскиот брег “ ни изјави Зоран Рујак.
Оваа наколна населба според археолозите била составена од повеќе платформи кои биле поврзани со посебни дрвени мостови наместо онаа во Охрид која била на една платформа. Кај Мрдаја во Дојран биле откриени повеќе колци кои ги држеле платформите и мостовите и даваат една структурна целина на целата населба каде занаетчиството доминирало.
,,Добивме потврда за одредени концепти за организираноста на населбата , естетските и духовните навики на населението а добивме потврда дека во еден момент населбата страдала од други народи кои дошле од север“, вели археологот Рујак
Врз осова на добиените резултати и археолошки наоди во Стар Дојран е планирана изградба на музеј на вода кој ќе биде реплика на наколната населба со објектите поврзани со мостови за што струмичкиот завод и музеј изработи иден проект. Министерот за култура и туризам Зоран Љутков во септември кажа дека идната година ќе работи на основен проект со цел Дојран да стане дестинација за кутлурен и археолошки туризам.
„Особено внимание оваа година е посветено на капиталниот проект за изградба на Музеј на вода, преку реконструкција на праисториска наколна населба во Дојранското Езеро. Во тек се заштитни археолошки истражувања на локалитетот Мрдаја, додека основниот проект за изградба на музејот се очекува да започне во 2026. Музејот, кој ќе биде поставен директно на површината на езерото, ќе функционира како ‘жив музеј на отворено’, со висока едукативна и туристичка вредност. Со ваквиот пристап, Дојран добива можност да се позиционира како водечка дестинација за културен и археолошки туризам во поширокиот регион“, најави Љутков во септември годинава при посетата на Дојран (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
