Министерството за спорт потпиша Договор со скопската фирма „Битем“ за изградба на атлетска патека во вредност од околу 7 милиони и 750 илјади денари или за околу 126 илјади евра. Скопската фирма, го доби тендерот во конкуренција на „МСА Компани“ доставувајки најниска цена по распишаната јавна набавка на Министерството со што и официјално може да отпочне изградбата на ова спортска инфраструктура.
Според информациите од Општина Гевгелија, атлетската патека ќе се гради во населбата Стара касарна односно урбан блок број 5 во непосредна близина на спортските објекти и игралишта во ова населба. Со реализацијата на овој проект се отвора можност за професионално и рекреативно атлетско трчање. За потсетување Гевгелија полека се мапира на светската атлетска карта благодарение на АК „7 ми Ноември“ и организацијата на „Novembar run“.
Според техничката спецификација, станува збор за атлетска патека од четири траки со еластична спортска подлога со дебелина до 13 мм која ќе биде поставена на асфалтна подлога. Паралелно се планирани и монтажа на 10 клупи за седење како и поставуавање на четири корпи за отпадоци околу патеката
Според склучениот Договор, атлетската патека треба да биде готова напролет или во рок од 6 месеци. Три милиони денари ќе бидат исплатени ова година додека остатоткот од средства како што стои во склучениот Договор идната година. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
