Центар за едукација култура и активизам Мултус од Гевгелија во партнерство со Регионален центар за одржлив развој од Гевгелија, одржа завршен настан за проектот кој третира медиумска писменост и критичко размислување „Медиумска диверзија“. На настанот беа поканети сите учесници, соработници и партнери на проектот, со цел доделување сертификати и благодарници за успешната соработка.
На самиот настан Мултус одржа и затворена премиера на филмот „Една пилула плус – еден килограм минус“. Во филмот, кој е работен од средношколци и ученици од основно училиште од Гевгелија, заедно со филмски професионалци во улоги на консултанти за режија, монтажа и сценарио.
Филмот „Една пилула плус – еден килограм минус“ ја третира темата од лесното „наседнување“ на медиумски манипулации, во случајот на нереални и лажни реклами за апчиња за слабеење. Во филмот, млада девојка верува во нереални резултати за рекорден рок и наидува на реклама која треба да ги исполни нејзините соништа за експресни резултати. Ваквите манипулации се доста чести, а особено се ефикасни кога бараме за да најдеме нешто што ќе ги поткрепи нашите верувања и пристрасни убедувања.
Филмот ќе ја има утре и својата онлајн премира, по што ќе остане достапен за јавноста.
Проектот „Медиумска диверзија“ траеше 9 месеци, а официјално завршува на 10.02.2022. Како дел од него, Мултус изработи 6 видеа со преку 350.000 прегледи од граѓаните, на темата медиумско описменување и развој на критичкото размислување со Дејан Малзарков и тимот на Диверзија, одржа 7 обуки и презентации на темата во Општините Гевгелија, Валандово и Богданци и нивните рурални средини, како и го реализираше овој краток филм „Една пилула плус – еден килограм минус“ со основци и средношколци од Гевгелија и Валандово.
Проектот „Медиумска Диверзија“ е под-грантист од проектот „Отпор кон дезинформации и говор на омраза“ спроведуван од Македонски институт за медиуми, а поддржан од Европската унија.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
