Повлекувањето на Владо Милев од претседателската и позицијата играч на шампионот ОК „Струмица“ ја изненади одбојкарската јавност во земјава. Станува збор за име кое зад себе има огромно искуство и требаше да преставува мотор за помладите струмички одбојкари. Веста дека Милев се повлече, ја објави ОК Струмица на својата ФБ страна при што му се заблагодарија на се што има направено досега. Милев за Дрнка МК потврди дека се повлекува од шампионот но останува со репрезентацијата. Најверојатно повторно че отпочне интернационална кариера
,,Мојата визија беше вложување во младите и европска ОК Струмица – јасна стратегија и долгорочeн развој. Кога енергијата се троши на убедување на сопствената управа дека клубот не се води од кафуле, тогаш фокусот се губи. Избрав да се повлечам за да останам доследен на моите принципи“ изјави за Дрнка.МК Владо Милев.
Тој признава дека ни најмалку не било лесно да се води клубот изминативе години. Клубот се соочувал со финансиски потешкотии но успеал да го одржи на врвот и да го премости јазот меѓу долговите и шампионските титули. Негов фокус бил да се градат млади момци и да се зацврсти соработката со полскиот шампион Јастрзебски
,, Горд сум што донесовме европски шампион во Струмица, соработката со неколкукратниот шампион на Полска – Јастрзебски. Тоа не беше само соработка, туку школа за нашите деца. Мојата одлука да играме со 16-17 годишни момци сезонава беше ризик кој се исплатеше – победата во Штип докажа дека младите можат, ако некој верува во нив. За жал само јас и мал дел на луѓето околу мене веруваа во овој проект.,, изјави Милев за Дрнка.МК портал.
На крај тој одговори дека ја презема целата одговорност за сè што (не) беше направено и се повлекува да не биде пречка, надевајки се дека новата управа ќе има, како што кажа, подобар план од ‘преживување од ден за ден’. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
