Се поизвесно е дека Струмица ќе има свој преставник во Втората кошаркарска лига. Како што дознаваме струмичкиот интернационалец и своевремено репрезентативец Владо Илиевски влегува во КК ,,Струмица’’ за да се формира екипа за Втора лига, каде ќе можат струмичани да се натпреваруваат во сениорска конкуренција. Според информациите, Илиевски покажал интерес да биде дел од клубот за да се врати сјајот на струмичката кошарка за што се заложил и градоначалникот Коста Јаневски. Двајцата, како што дознаваме имале средба на која се разговарало токму за овој проект.
Според информациите, зад проектот КК ,,Струмица’’ во втора лига застанала и општина Струмица и неколку струмички фирми кои ќе бидат финансиски спонзори за престојната сезона. Клубот треба да има за цел да им даде шанса на веќе повозрасните момци од Струмица за стекнување натпреварувачко искуство во сениорска конкуренција. Клубот освен во сениорска конкуренција ќе има и младинска екипа во категоријата М16 која ќе се натпреварува под капата на КФСМ.
Впрочем неодамна токму на темата Струмица да партиципира во Втора лига, се разговараше и на највисоко ниво во општина Струмица кога раководството на КФСМ беа на средба со градоначалникот Коста Јаневски. Тогаш градоначалникот ни потврди дека се отвориле повеке опции за да се најде вистинското решение.
,,Разговаравме за идејата и можноста да се формира кошаркарски второлигаш кој ќе се натпреварува во сениорска конкуренција. Идејата ја поздравија и од Федерацијата и допрва заеднички ќе работиме на тој сегмент. На маса отворивме повеќе опции како да се најде вистинското решение, бидејки наша примарна цел е да го вратиме сјајот на струмичката кошарка и создавање на нови кошаркарски имиња. Ние како општина постојано сме ја помагале кошарката кога била во сениорска конкуренција. Ја потврдив мојата заложба за континуирана поддршка, но и потенцирав дека треба сите заедно да соработуваме и да го дадеме максимумот за развој на спортот и кошарката во нашата општина’’, изјави тогаш градоначалникот на Струмица Коста Јаневски
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
