Ветерниот парк Богданци ќе се проширува со поголеми и помоќни турбини, со што ќе го зголемиме нашето производство на електрична енергија од обновливи извори. Вака најави првиот човек на АД ЕСМ Васко Ковачевски кој денеска потпиша два договори со претставничката на конзорциумот Фихтнер – Германија во земјава Елена Чекулаева, за консултантски услуги поврзани со реализацијата на втората фаза од изградбата на Паркот на ветерни електрани Богданци.
Едниот договор е во износ од 164.312,50 евра и се однесува на консултантски услуги за подготвителни работи со кои се предвидува ажурирање на Студијата за заштита на животна средина, како и спроведување на геолошки и геотехнички истраги. Поголем дел од средствата за овој договор ќе бидат покриени со грант средства од Германската KfW Банка во висина од 162.900 евра.
Другиот договор во износ од 985.192,50 евра се однесува на консултантски услуги за проектирање, подготовка на тендерска документација и надзор на изведба на работите.
Паркот на ветерни електрани Богданци – втора фаза, која ја најави Ковачевски при неодамнешната посета на овој капацитет во Богданци, ќе се состои од 4 до 6 ветерни турбини, секоја со номинална моќност од 3 до 4 MW. Со овој зафат, ќе зголеми инсталираната моќност на АД ЕСМ од обновливи извори за 13,2 MW и годишно производство од дополнителни 37 GWh, доволни за снабдување со електрична енергија на околу 6.000 домаќинства.
Ветерниот парк Богданци во моментот работи со 16 турбини, кои во втората фаза која сега се спроведува ќе биде проширен со нови турбини, со поголема моќност од постоечките. Со тоа, ветерната електрана, ќе биде заокружена на проектирана моќност од 50 MW. Инаку минатата недела првиот човек на ЕСМ Ковачевски имаше средба со градоначалникот на Богданци Блаже Шапов за соработката во иднина за околу ветерниот парк
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
