Компанијата Ван Хоол Македонија ќе стипендира и поддржува два магистри на Факултетот за електротехника и информациски технологии при Универзитетот „Св. Кирил и Методиј“ – Скопје.
Деканот на ФЕИТ, професор д-р Димитар Ташковски, на денешното потпишување на договорите за стипендирање, истакна дека Факултетот продолжува со своите активности за унапредување на својата трета мисија: соработката со индустријата.
„Ова соработка станува се позначајна во современото општество, бидејќи овозможува трансфер на знаење, иновативни решенија и можности за нови вработувања. При дефинирање на оваа соработка, секогаш во фокусот се нашите студенти – затоа континуирано ги прилагодуваме нашите студиски програми за потребите на индустријата, а компаниите обезбедуваат практична работа и реални проекти за студентите, донираат опрема и слично. Денешниот договор е пример за таква соработка, со што се обезбедени школарини и стипендии за двајца студенти на магистерски студии кои треба да работат на конкретни истражувачки проекти во самата компанија“, вели Ташковски.
Ванхоол ќе стипендира кандидати од областите „компјутерско системско инженерство, автоматика и роботика“ и „компјутерски технологии и инженерство“ на ФЕИТ. Освен стипендиите, компанијата ќе ја продолжи досегашната соработка со ФЕИТ при реализација на други проекти.
„Ван Хоол повеќе од две години активно трансферира дел од својот know-how од Белгија од областа на напредни технологии за изработка на возила со нула-емисија на штетни гасови по околината, т.е. на електрични и водородни градски и туристички автобуси. Досега компанијата ширум Европа и САД има пласирано преку 1200 такви возила. Нашите развојни активности во периодот што измина и во периодот што следи уште повеќе ги засилуваме и сме среќни и задоволни што имавме можност да најдеме една таква сериозна институција како што е ФЕИТ со која соработуваме и која покажа интерес и волја ефективно и практично да се вклучи во понатамошниот развој на овие технологии водени од страна на нашата компанија. Преку идентификување на соодветни студиски програми и студенти во фаза на пост-дипломски студии, кои нашата компанија дополнително ќе ги поддржи преку стипендирање и вклучување во истражувачките дејности, ја продолжуваме оваа успешна соработка“, изјави Аврам Стојчевски, генерален директор на компанијата Ван Хоол.
(Комерцијална објава)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
