Наредбата за задолжтелна вакцинација што ја наложи претседателот на САД, Џо Бајден се однесува само за извршната власт. Тааа ги вклучува вработените во Белата Куќа и повеќето федерални работници. Наредбата на Бајден важи и за вработените во Центарот за контрола и превенција на болести, Агенцијата за храна и лекови, коишто се владини агенции, но не и за Конгресот. Тој е изземен од оваа наредба, затоа што е дел од легислативната власт
Рецензираме пост на Фејсбук во којшто се тврди дека одредени групи на вработени во клучни институции во Соединетите Американски Држави, се изземени од барањето да се вакцинираат, поради тоа што работат токму во тие институции. Додека за останати граѓани, кои работат во други компании и јавни сервиси во САД, вакцинацијата до одреден датум е задолжителна за други тоа не важи, се инсинуира во постот.
НЕМА ДА ВЕРУВАТЕ! Погледнете кој се во САД е изземен од земање вакцина! Конгресмените, оние кои ги произведуваат, CDC ( Центарот за контрола на болести), FDA (Агенцијата за храна и лекови) – сите оние, кои ги задолжуваат луѓето да ја земат и уште некои други! Логично би било, ако е таа толку добра и општо-корисна за човештвото, и тие самите да ја земат, нели?, се вели во постот.
За што, всушност, станува збор?
Дали навистина вработените во Центарот за контрола на болести на САД, вработените во Агенцијата за храна и лекови на САД и вработените во фармацевтските компании производители на вакцините, се исклучок од задолжтелната вакцинација што претседателот на САД, Џо Бајден ја наложи на 9 септември 2021. Тогаш Бајден, исто така, соопшти дека сиот персонал во приватниот сектор, односно во фирми со повеќе од 100 вработени ќе мора да се осигура дека се целосно вакцинирани или дека се тестираат редовно.
Прво, точно е дека Конгресот е изземен од оваа извршна наредба на Бајден за вакцинација, затоа што е дел од легислативната гранка на власта. Наредбата се однесува само за извршната власт, која ги вклучува вработените во Белата Куќа и повеќето федерални работници. Со наредбата за вакцинација се инкорпорирани и вработените во Центарот за контрола и превенција на болести, Агенцијата за храна и лекови, коишто се владини агенции.
„Фајзер“, најголем производител на вакцини во САД, на 4 август 2021 година најави дека ќе бара сите негови вработени и контрактори во САД да бидат вакцинирани, или да партиципираат во неделни тестирања за ковид. Компанијата „Модерна“ која, исто така, произведува вакцини, на 20 август 2020 година соопшти дека ќе бара од сите вработени да се вакцинирани против ковид до октомври, со исклучок од религиозни и медицински причини на индивидуална основа.
Барањата на Бајден за вакцинација се издадени во форма на егзекутивна наредба (executive order) што претставува директива која се однесува само на извршната власт. Затоа Конгресот не е дел од неа, поради поделбата на власта и поради тоа што Конгресот е дел од легислативната власт.
Поради тоа што наредбата за вакцинација важи за Центарот за контрола и превенција на болести на САД, за Агенцијата за храна и лекови на САД, за „Модерна“ и „Фајзер“ како најголеми фармацевтски производители на вакцини, а не важи за Конгресот, постот го оценуваме како делумно невистинит.
Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
