Општинскиот центар Босилово годинава ќе добие спортско рекреативна трим патека вдолж реката Струмица во должина од околу еден километар на која ќе биде поставена и урбана опрема. Станува збор за проект што го реализира Центарот за развој на Југоисточниот плански регион кој при крајот на минатата година распиша тендер а деновиве склучи договор за изведба.
Трим патеката ќе ја гради скопската фирма „ОСД Кирил ДООЕЛ“ која на електронската аукција достави најниска цена за работите предвидени во техничката спецификација и тоа во конкуренција на дури 12 фирми од цела држава. Целиот проект треба да го реализира за 4,7 милиони денари со вклучен ДДВ што е за речиси 3 милиони денари пониска од проценетата вредност со распишувањето на Јавната набавка при крајот на минатата година.
Како што стои во склучениот договор, спортско рекреативната трим патека кај Босилово треба да биде готова за 6 месеци од денот на воведување на фирмата во работа. На трим патеката со должина од 1003 метри треба да бидат поставени 15 бетонски канти со внатрешен опшиен лим за отпадоци и 15 дрвени клупи за одмор и релаксација. Паралелно на трим патеката треба да има и паркинг од околу 565 метри квадратни.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
