Општините Богданци и Ново Село ќе добијат нови комунални возила за собирање на отпадот, со што значително ќе се подобрат капацитетите на комуналните претпријатија во овие две општини. Станува збор за набавки кои ги реализира Центар за развој на Југоисточниот плански регион преку проектот „Подобрување на комуналните услуги во Југоисточниот плански регион преку набавка на возила за општините Богданци и Ново Село“. Вкупната вредност на овој проект чини околу осум милиони денари од кои основното финансирање е од Министерство за локална самоуправа преку програмата за зголемување на регионалната конкурентност, со учество на двете општини.
„Во рамки на овој нов регионален проект, се набавуваат специјализирани возила за собирање отпад, со цел да се зголеми ефикасноста на комуналните услуги и да се подобри хигиената во населените места. Проектот директно придонесува кон намалување на дивите депонии, зајакнување на капацитетите на јавните комунални претпријатија и подобрување на животната средина и јавното здравје. Истиот претставува важен чекор кон одржливо управување со отпад и чиста животна средина во Југоисточниот плански регион“, соопштија од Центар за развој на Југоисточниот плански регион.
Од Центарот се уверени дека новите возила ќе придонесат кон поефикасно и редовно собирање на отпадот, но и зголемување на довербата на граѓаните во општинските служби, како и намалени трошоци за одржување и замена на дотраените возила во јавните претпријатија Комунална чистота во Богданци и Комуна од Ново Село.
За возилото во Богданци веќе е склучен Договор за јавна набавка. Станува збор за специјално возило со надоградба „ѓубретарка“, кое има капацитет од 7 кубни метри отпад, со вредност од 4 милиони и 977 илјади денари, од битолската фирма Синпекс која била единствена што се јавила на распишаниот тендер на Центарот.
Јавна набавка наскоро ќе се распише и за второто возило за комуналното во Ново Село за што исто така беше потпишан договор меѓу Центарот и Општината.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
