Општина Василево доби известување од Министерството за транспорт дека се завршени сите административни постапки околу Договорите и средствата за реализација на Основниот проект – Партерно уредување на школски двор во ООУ „Гоце Делчев“ ПУ с. Ангелци со кој општината аплицираше од Проектот за поврзување на локални патишта компнента 2.2 – проекти од значење на заедницата. Битолската фирма Стентон градба ќе ги извршува работите на терен со која Министерството за транспорт во јули минатата година склучи Договор а минатиот месец анекс на Договорот. Ептиса од Мадрид Шпанија е избрана за вршење надзор на работите.
„Уредувањето на училишниот двор опфаќа: изградба на детско игралиште со нови модерни содржини; опрема за вежбање и рекреирање; нови зелени површини; нова урбана опрема(клупи и корпи за отпадоци); изградба на ограден ѕид; поставување на метална ограда; изградба на пристапни патеки. Децата се иднината на секое општество. Тие заслужуваат безбедни и инспиративни простори за игра и престој. Продолжуваме посветено да работиме и да ги реализираме ветувањата – чекор по чекор, проект по проект. Заедно градиме подобра општина“, објави градоначалникот на Василево Славе Андонов.
Средствата за реализација на сите наведени активности, според предмер пресметката изнесуваат 4 353 893 денари од кои 2 440 000 денари се обезбедени преку Проектот за поврзување на локани патишта (ППЛП) на Министерството за транспорт со заемот од Светска банка, и 1 913 893 денари од Буџетот на општина Василево, за што Советот на општина Василево на една од своите седници има донесено одлука.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
