Битолската фирма „Стентон Градба“ ДОО од селото Долно Оризари, го доби тендерот за доизградба на стариот струмички театар. На распишаната јавна набавка за „Реализација на основен проект за изведба и довршување на Стар Театар Струмица“ на Национална Установа Завод за заштита на спомениците на културата и Музеј- Струмица, битолската фирма доставила најниска цена. Според информациите на Дрнка МК тие на електронската аукција доставиле понуда од 139 милиони и 104 илјади денари или околу 2,26 милиони евра. На сајтот на Бирото за јавни набавки веќе стои дека е донесена одлука, оти битолската фирма „Стентон Градба“ ДОО од с. Долно Оризари е избрана за најповолен понудувач.
Станува збор за проектот ,, Изградба на Стар Театар Струмица“ изработен од PRO Control, Belgrad со сите негови измени и дополнувања. Реализација на проектот е започнат во 2014 а е прекинат со спогодбено раскинување во 2023 година. Според надзорите, објектот на стариот струмички театар е 60 % завршен. Инаку пролетва во Гевгелија на промоцијата на манифестацијата „Гевгелија – град на културата“ министерот за култура Зоран Љутков кажа дека до крајот на 2026 година ,,стариот театар“ во Струмица конечно ќе биде готов.
„Наследивме многу закочени проекти, меѓу кои беше и изградбата на стариот Струмички театар. Договорот таму e раскинат спогодбено. Направивме ревидирање на основниот проект за да ги видиме сите пропусти. Имаме озбезбедено средства за овој капитален објект и за еден месец ќе се распише тендер за продолжување на изградбата со двегодишно финансирање. Нашата тенденција е до крајот на 2026 да биде отворен овој капитален објект“, рече министерот Љутков во февруари годинава
Според техничката понуда приложена во Јавната набавка – битолската фирма во наредниот период ќе мора да заврши повеќе позиции. Треба да се работи на опремата за осветлување на објектот и инсталации, сценска опрема за осветлување и инсталации , хидротехнички инсталации, термотехника греење и климатизација, телекомуникациски инсталации и опрема, сценска механика и управување, аудио и и видео системи како и партерно уредување.
,,Економскиот оператор е должен работите во врска со проектот да го реализира во рок од 24 месеци , а плаќањето ќе биде во три буџетски години согласно програмата на Влада во делот на капитални инвестиции“, стои во техничката спецификација од Завод и музеј Струмица. (В.Трајков)
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
