Секторот за внатрешни работи Струмица ја информира јавноста дека во изминатиот период е забележана појава да се пријавуваат настани во кои граѓани, претежно повозрасни лица биле измамени или непознати лица се обиделе да ги измамат, на тој начин што телефонски ги контактирале и претставувајќи се лажно како лекари или други здравствени работници, ги доведуваат граѓаните во заблуда, тврдејќи дека нивни блиски лица доживеале сообраќајна или друга несреќа и дека е потребна итна интервенција, за која наводно мора веднаш да се дадат пари.
СВР Струмица апелира до граѓаните да бидат особено внимателни и да не наседнуваат на вакви обиди за измама. Во вакви ситуации, граѓаните не треба да даваат лични податоци, ниту пак да предаваат или уплаќаат пари на непознати лица.
Исто така, апелираме до граѓаните, доколку добијат ваков повик веднаш да го прекинат разговорот, а секој сомнителен повик или обид за измама веднаш да се пријави во најблиската полициска станица или на телефонскиот број 112.
Како што веќе информиравме, СВР Струмица презеде мерки и активности по вакви пријавени дела, при што е откриено едно лице кое учествувало во извршување на истите, но уште еднаш упатуваме апел до граѓаните за зголемена внимателност и соработка со полицијата
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
