Ансамблот „Тримери“ од Струмица од неодамна доби етнокореолози со кои ги продолжуваат пробите и усовршувањето на кореографиите за престојните настапи. Станува збор за Александар Арсов и Симе Стоилов кои доаѓаат од Факултетот за музичка уметност во Штип – промотори на македонските традиционални ора, бидејќи работат со повеќе ансамбли во државата.
Членовите на Тримери ова лето ќе настапат на манифестацијата „Илинденски денови“ во Битола, но се подготвуваат и за меѓународни настапи.
„На наша адреса стасаа покани од Кападокија и Трабзон од Турција, но и од фестивали во Португалија, Романија и Шпанија. На која интернационална сцена ќе ги презентираме македонските ора преку традиционалните носии, допрва ќе одлучуваме“ – информираа од ансамблот, кој веќе 13 години успешно работи
Инаку досега од основањето Ансамблот „Тримери“ има 38 гостувања во странство и претставува вистински репрезент на македонската култура, но и на градот Струмица.
Ансамблот „Тримери“ работи трипати неделно, а паралелно врши упис и на нови членови. Сите нови ора и танци што ги подготвуваат, струмичани ќе имат можност да ги видат на годишниот концерт кој секоја година се одржува во месец декември.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
