Младата Ангела Маџирова од Богданци неодамна го објави својот прв албум “Bitter Blues” во која се јавува и како автор и како интерпретатор. Инспирацијата за нејзиниот албум ја добива од блуз музиката а планира и понатаму да експериментира нови жанрови. Сака да направи и албум на македонски и да компонира песни и музика за филм и мјузикли
Дрнка.МК: Која е впрочем Ангела Маџирова како дојде љубовта за музиката, пеењето
Ангела: Јас сум Ангела Маџирова – ANGIE; артист, песнописец и композитор. Родена и порасната во Богданци,а љубовта кон музиката отсекогаш тлеела во мене. Започнав со музичкото образование со часови клавир, членував во хорови, оркестри, играорна група, а слушав и часови по пеење додека бев во основно училиште и за време на средношколските денови. Уште од самите почетоци на мојата едукација креативноста и творењето ми беа голема желба и предизвик, а и знаев дека ќе се занимавам со тоа во иднината и дека тоа ќе ми биде кариерна определба.
Дрнка.МК: Збор два за мини албумот, како дојдовте до идеја и дали беше тешко, кој се е вклучен во овој проект
Ангела: “Bitter Blues” се случи многу природно и песните меѓусебно се склопија идеално. Сѐ започна на предавање каде се сретнавме со Кол Хатчинсон кој доаѓа од Северна Каролина, САД, продуцентот, микс и мастер инженерот зад овој проект кој и напиша една од песните. Соработката почна така, во академска и пријателска средина но полека прерасна и во професионална соработка. Со текот на времето, а особено во последните неколку години, сфатив дека мојата најголема инспирација доаѓа од музика како рок, кантри, музички театар и поп коишто се сите деривативни жанрови од блузот, па одлучив да го негувам тој афинитет и да се впуштам во таквата музика, додека горчливоста во песните исплива сама после низа на случки коишто беа инспирација за песните. Така настана и насловот на мини-албумот, “Bitter Blues”. Целиот процес на пишување, продукција и пост-продукција бараше издржливост и концентрација, меѓутоа беше преубаво и возбудливо, а како и за секој уметник што го сака својот занает, не ни претставуваше никаква тешкотија без разлика дали имаше посакувани резултати или неочекувани препреки.
Дрнка.МК: Ги има на Youtube но планирате ли спотови, медиумска промоција
Ангела: За графичкиот дизајн за “Bitter Blues” се погрижи Радмила Гошевска, моја сограѓанка која успеа визуелно да ја прикаже целата атмосфера и енергија на мини-албумот баш како што ја чувствувавме и како што го замислувавме дизајнот.
Сите песни имаат и своја “видео приказна” — визуелизации кои го надополнуваат дејството и раскажуваат уште повеќе од самите песни. Видеата можат да се најдат на мојот YouTube канал на следниот линк:
Дрнка.МК: Идни планови, ќе има ли албум на македонски, кои се вашите замисли, желби
Ангела: Во наредниот период ќе продолжам со образованието и ќе се надоградувам на кариерно поле. Ќе продолжиме да соработуваме со Кол, а планирам да експериментирам и да творам во нови жанрови, а се разбира и музика на македонски и за Македонија. Во иднина, се гледам како музички артист, но се пронаоѓам и во светот на компонирање песни и музика за филм и телевизија како и во пишувањето мјузикли. Музиката отсекогаш претставувала начин за луѓето да се изразуваат и да си помагаат меѓусебно, но и за да направат позитивна промена во светот. За мене главна цел е со моето творештво и музиката да придонесам кон подобри промени, да бидам промената којашто сакам да ја видам и да помагам на било каков начин со моите стихови и мелодии.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
