Џио Струмица славеше и против Јанта, со три победи од три меча ќе патува во Кипар кај Омонија

375

Одбојкарите на Џио Струмица ја забележаа и третата победа во првенството во исто толку мечеви од Првата одбојкарска лига. На свој терен во салата Парк во Струмица, по победите над Лирија и Весна во Пробиштип, со 3:0 во сетови лекција им одржаа и одбојкарите на Јанта. Избраниците на Кире Ричлиев вложија толку колку што беше потребно да се оствари и нова победа и да се исфрлат како главни конкуренти за високи дострели ова сезона.

Гостите од Скопје во првиот сет освоија 16, во вториот 17 а во третиот 18 поени но немаа доволно сила да направат изненадување и да ја разнишат играта на струмичани кои веќе идната недела патуваат за Кипар на двомечот со Омонија Никозија во рамките на Челенџ Купот.

Со ова победа и максимален учинок, Џио Струмица се лидери на прволигашката табела, пред Шкеднија со која силите ќе ги одмерат веќе во следното првенствено коло.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.