Џафери ги распиша локалните избори, ДИК ги утврди роковите за изборните дејствија

32

Претседателот на Собранието Талат Џафери денеска го потпиша решението со кое ги распиша локалните избори на 17 октомври. Бидејќи изборната кампања почнува дваесет дена пред денот на одржување на изборите, во тој период, Џафери најави дека Собранието нема да има пленарни и комисиски седници за да им се овозможува на политичките партии и кандидати целосно да се посветат на изборната кампања, а во исто време да се одбегне можноста кампањата да се пресели во собраниската сала.

Државната изборна комисија на јавна седница попладнево веднаш по добивањето на решението со кое беа распишани локалните избори ги утврди поважните рокови за изборните дејствија за изборите закажани за 17 октомври, годинава.

Согласно одлуката, листите на кандидати за локалните избори се поднесуваат до општинските изборни комисии од страна на овластените предлагачи, а крајниот рок за нивно поднесување е заклучно со 11 септември до 24 часот.

Изборната кампања започнува на 27 септември во 00 часот, што значи се смета и денот 27 и трае заклучно со 15 октовмри до 24 часот, кога настапува изборниот молк на 16 септември, пред гласањето.  На 16 октомври гласаат болните, немоќните, а на 17 октомври е денот на изборите. Жрепката за редоследот на гласачкото ливче на листите на кандидати, ДИК ќе ја спроведе најдоцна до 23 септември и сите листи на кандидати од ист подносител во сите општини ќе имаат согласно Изборниот законик, ист реден број, како што е уредено со закон за да биде поедноставно за  гласачите. На 23 септември, ДИК со претставниците на подносителите на листите ќе организира потпишување на изборниот кодекс за фер и демокартски избори.

Собирањето потписи на граѓани за поднесување на листи на кандидати или независни листи на кандидати ќе започне на 16 август и ќе трае 15 дена заклучно со 30 август, а ќе се одвива во сите подрачни одделенија и канцеларии на ДИК низ државата и согласно измените на Избониот законик од лани, пред надлежни нотари кои ќе бидат определени од страна на самите подносители на листи, за што дополнително ќе бидат издадени упатства.

Јавниот увид во Избирачкиот список ќе започне на 21 август и ќе трае заклучно со 9 септември во 24 часот во сите подрачни одделенија и канцеларии на ДИК. Борис Кондарко членот на ДИК, потсети дека покрај увидот во Избирачкиот список кој трае за време на распишани избори, ДИК согласно законот четири пати во годината го ажурира списокот, па граѓаните можат електронски 24 часа да ги проверуваат своите податоци. Последното ажурирање е од мај, годинава, а за изборите ќе се користат најновите податоци од Избирачкиот список, за кои денеска согласно закон, ќе се обратат до МВР за да им ги достави.

Рокот за пријавувањето на болни и немоќни лица кои гласаат ден пред изборите, е седум дена пред изборите, додека рокот за пријавување на набљудувачите – домашни и меѓународни НВО, претставници на меѓунарони мисии и амбасади, трае до 6 октомври. Политичките партии ќе добијат известување од ДИК најдоцна 1 септември за именување свои претставници и заменици во избирачките одбори, по што за пет дена тие треба да ги достават нивните имиња.

На седницата беше усвоено и барањето кое ќе биде доставено до МВР за доставување податоци за ажурирање на Избирачкиот список, односно податоци за граѓани со наполнети 18 години заклучно со денот на одржување на изборите за прв круг гласање кои имаат важечка лична карта или патна исправа, податоци за граѓани со наполнети 18 години чиј рок на важност на лична карта или патна исправа завршува од денот на распишување на изборите (од 6 август) до денот на гласање 16 октомври…МВР со измените на занонот доставува и фотографии за овие граѓани, а во наредната фаза со воведување на електронска идентификација на гласачите со отпечаток од прст, во наредната фаза од изборниот процес МВР ќе ги достави и овие податоци. За ажурирање на податоците на Избирачкиот список, ДИК ќе се обрати и до основните судови, МТСП и до казнено-поправните установи за извршување санкции.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.