Со пари и стручен тим од Агенцијата за меѓународна поддршка на Јапонија ќе се пошумува горниот тек од Радовишка река за да се намалат ризиците од поплави при поројни дождови и свлечишта на земјиштето.Носител на проектот е Центарот за управување на кризи каде веќе една година десетина градежни инженери од Јапонија работеа на мапирање на теренот и изработка на план за пошумување за спречување на природни кататстрофи.
„Станува збор за проект наречен ‘Екосистемски-базирани решенија за намалување на ризици од катастрофи‘. Насочен е кон намалување на ризици од природни непогоди, пред се поројни поплави, свлечишта, ерозии на земјиште и шумски пожари. Целта на проектот е преку употреба на екосистемски-базирани решенија да се намалат силните влијанија од овие непогоди, преку пошумување, во комбинација на минимални градежни зафати, како изградба на потпорни ѕидови. Ќе се садат посебни видови садници кои имаат големи корени“, вели Стевко Стефаноски од Центарот за управување со кризи кој е национален координатор на проектот.
На првата локација во Радовиш, во горниот тек на Радовишка река, било утврдено дека падините се голи и секој дожд со голема брзина се слива во коритото на реката што предизвикува поплави. Јапонската помош за реализација на овој проект изнесува 2 милиони евра и освен во Радовиш ќе се пошумува и на Водно и во Велес.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
