Јанев: Инсистирам да се открие како пожарот кај Едрениково избувна на повеќе места но и казна за сторителите

1017

Пожарот кој избувна кај Ташли Баир кај населеното место Едрениково а се прошири и кон атарот на населеното место Владевци а стаса и до магистралниот пат Струмица-Радовиш сеуште не е ставен целосно под контрола. Според информациите на одделни места и понатаму гори.  ТППЕ Струмица со 6  возила и 20 пожарникари сеуште е на терен до целосно ликвидирање на пожарот.

Првиот човек на Василево Марјан Јанев на својата ФБ страна објави дека ќе бара од надлежните да се расчисти случајот и да одговараат сторителите бидејки во вакви ситуации последиците може да бидат несогледливи, бидејки претпладнево пожар избувнал на повеќе места кај населеното место Едрениково.

,,Денес во попладневните часови , кај Ташли Баир, во близина на населеното место Едрениково на неколку места избувна пожар, кој и покрај напорите на противпожарните екипи кои цело време се на терен сеуште не е ставен под контрола и е раширен кон атарот на Владевци. Гори сувата трева и нискостеблестата шума над населеното место Владевци кон атарот на Струмичко Поле. Пред извесно време огнот беше префрлен кај магистралниот патен правец Струмица – Радовиш во непосредна близина на населеното место Владевци, па за регулирње на сообраќајот беше вклучена и полицијата. Во овој специфичен момент како градоначалник на општина Василево кој цел ден е заедно со ТППЕ Струмица, единствено ќе кажам дека штетите од несовесното однесување на поединци ќе ги трпиме сите. Јавната осуда за овој чин не е доволна и затоа ќе инсистирам на целосно расчистување на случајот и соодветна казна за сторителите. Апелирам до сите да се однесуваат крајно одговорно, бидејќи последиците можат да бидат несогледливи не само по имотите на граѓаните туку да бидат загрозени и човечки животи, нешто што никој од нас не сака да се случи’’ објави Јанев

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.