Цел свет знае кој е Путин – остри реакции од САД и ЕУ до Република Српска која го одликува рускиот претседател

640

Доделувањето на највисокото одликување – „Орденот на Република Српска“ на Владимир Путин, претседателот на Руската Федерација, е за осуда, а застанувањето на страната на Путин во такви околности, значи меѓународно изолирање на Република Српска и нејзините лидери. Вака реагираа амбасадата на САД во Сараево и Европската Унија, откако претседателот на Република Српска, Милорад Додик вчера на свеченост му додели орден на Путин

Пишува: Весна Коловска

Одлуката на Милорад Додик да го дарува и награди Владимир Путин, човекот кој започна неиспровоцирана инвазија на Украина што резултира со смрт на илјадници цивили и масовно уништување на инфраструктурата, е за осуда, се вели во соопштението на американската амбасада во Сараево.

Рускиот претседател Путин е одликуван на одбележувањето на 9 Јануари, таканаречениот Ден на Република Српска, којшто од страна на Уставниот суд на Босна и Херцеговина во два наврата беше прогласен за неуставен.

Додик, при доделувањето му се заблагодари на претседателот на Руската Федерација, Владимир Путин, за како што рече: „сигурната поддршка на Република Српска“.

Благодарение на позицијата на Владимир Путин и силата на Руската Федерација, гласот и позицијата на Република Српска се слушаат и се почитуваат, а нејзината позиција е зачувана под налетот на меѓународниот интервенционизам, рече Додик, кој најави дека орденот ќе му го врачи лично на Путин на следната средба.

На ова остро реагираше Европската Унија, преку портпаролот Петер Стано, кој на редовниот брифинг во Брисел беше јасен – во ЕУ нема место за доделување награди на политичари што наредуваат уништување на соседна земја и убивање на нејзините граѓани.

Целиот свет знае кој е Владимир Путин. Европската Унија ја осудува одлуката на Република Српска да му додели орден. Путин е директно одговорен за наредбите за убивање украински цивили и уништување на украинската цивилна инфраструктура. Застанувањето на страната на Путин во такви околности значи меѓународно изолирање на Република Српска и нејзините лидери. Во Европската Унија нема место за доделување награди на политичари што наредуваат уништување на соседна земја и убивање на нејзините граѓани, а тоа мора да им биде јасно на сите. Оваа одлука е за жалење и погрешна, изјави Стано.

Со Дејтонскиот мировен договор во 1992 година беа формирани два ентитета, Федерација Босна и Херцеговина и Република Српска. Двочлената држава е предводена од претседателство составено од три лица: еден претставник на Србите, Хрватите и Бошњаците (босански муслимани).

Неодамна државата доби кандидатски статус за членство во ЕУ.


Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.