Тестот за ковид не е наменет во него да се тестира вода, туку примерок од нос или грло!

81

Рецензираме пост на Фејсбук во кој се тврди дека тестот за детекција на коронавирусот излегува позитивен на вода. Како обид за докажување на таквото манипулативно тврдење презентиран е видео материјал, во кој лица кои личат на медицински персонал од лабораторија, а кои зборуваат на шпански јазик, го спроведуваат тестот со пет капки вода, кои што ги точат од обична чешма. Откако ќе се погледне видеото, се гледа и дека втората линија на тестот, која што треба да означува позитивен тест, се појавува, бледо, но, сепак, постои. Од ова, авторката на постот заклучува дека тестот е ,,позитивен на вода”.

За почеток ќе потсетиме дека не е првпат вакво тврдење да се појави на социјалните мрежи, малку видоизменето. На почетокот на пандемијата, кога се појавија брзите тестови кои детектираат ковид за 15-тина минути, конспирациските кругови се обидоа да ги депласираат со користење на кока кола и други прехрамбени продукти при тестирањето. Тестирано беше и киви.Антигенските брзи тестови се наменети да бидат користени на начин што во нив ќе се испитува примерок од човековите нос и грло, а не од храна и пијалоци кои имаат различни карактеристики. Така, кока колата што ја испитуваше австрискиот пратеник, има многу киселкаста PH вредност, која може да го оштети тестот, особено затоа што самиот пратеник воопшто при тестирањето не користеше бафер, супстанца која има за цел да ја одржува PH вредноста стабилна во текот на експериментот. Истата логика може да се преслика и на случајот со кивито.Компаниите Сименс и Роше во Австрија ги произведуваат антигенските тестови. Роше, по спроведениот тест со кока колата, истакна:Кока колата не е супстанца која е наменета да се тестира со овој тест и затоа не можеме да го сметаме методот за валиден. Физиолошката ПХ вредност во телото е строго регулирана на вредноста 7. Од друга страна, кока колата е многу киселкаста, со ПХ вредност 2.2 која што ги уништува поголемиот дел од протеините. Било кој тест базиран на протеини, нема да функционира со кока кола или ќе даде лажни резултати.На ова видео може да се погледне целосното тестирање спроведено од самиот производител, кое покажа негативен резултат на ковид-19, затоа што е користен бафер. Таа супстанца се користи за да ја нормализира ПХ вредноста на примерокот.

Но, што се случува со водата и тоа што таа наводно дава позитивен резултат на ковид во видеото и постот кои се предмет на нашиот интерес? Странските проверувачи на факти веќе имаат искуство со ваквите „експерименти“ и во разговори со производителите на овие тестови добиваат објаснување дека рапидните тестови треба да се користат со примерок од носот или од назофарингсот, а не со вода, храна или течности.

Кога се користи како што е наменет, станува збор за високо точен тест, кој што помага да се детектира ковид-19 ширум светот и може значително да ги подобри обидите и напорите да се конторлира трансмисијата. Да се шират дезинформации со намерна злоупотреба на медицински производ за време на пандемија е злоупотреба и не е одговорно, изјавиле од компанијата Абот, еден од водечките лидери во САД за брзи тестови за детекција на ковид-19.

Значи, проблемот не е во тестот и неговата точност, туку тоа што не е направен со соодветен материјал, односно брис од носот или грлото.

Како што можете да прочитате на официјалната страница на реномираната Мајо Клиника од САД, вирусот кој предизвикува ковид-19 не е детектиран во вода за пиење.

Поради тоа што вирусот не е детектиран во вода и поради тоа што тестот, презентиран во видеото, е направен со несоодветен примерок, заклучуваме дека е дезинформација оти ковид тестот е позитивен на вода. Овие бизарни тестирања за коронавирус на овошје, зеленчук и други прехрамбени производи имаат за цел да покажат наводна неточност и неефикасност на ковид тестовите. Меѓутоа, без разлика на тоа каков резултат ќе покаже тестот кога во него се испитува примерок од вода, на пример, тоа не значи ништо во поглед на ефикасноста на тестот, кога се применува за скрининг или детекција на ковид-19. Тоа само значи, дека во тестот е ставен неправилен примерок.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.