Струмичка фирма ќе го работи поројот на Крушевска кој за 578 илјади евра ќе стане шеталиште

7905

Струмички ,,Жикол’’ е фирмата што ќе ја врши реконструкцијата на каналот за атмосферски води на дел од улицата ,,Крушевска Република’’ во Струмица – прва фаза. Општина Струмица деновиве го склучи договорот со ова фирма која доставила најниска цена по распишаниот тендер во декември минатата година а на кој како што информираше Дрнка.МК  се јавија 10 компании кои мораа да исполнуваат одредени услови за да бидат во трката за овој проект. Вредноста на склучениот договор меѓу општина Струмица и компанијата Жикол со вклучен ДДВ изнесува околу 578 илјади евра, што е за околу 300 илјади евра помалку од проектирани средства за овој проект од страна на општината.

Станува збор за реконструкција на горниот дел од поројот ,,Крушевска Република’’ во Струмица. Како што најави градоначалникот Коста Јаневски при презентацијата на овој проект, со реконструкцијата, овој канал треба да прерасне во шеталиште со хортикултурно уреден простор. Конкретно станува збор за реконструкција на поројот од стационажа од 0+00 до 0+571.81 каде се планира и ново улично осветлување со нова урбана опрема.

Според склучениот договор, реконструкцијата треба да се реализира во период од 8 месеци од воведување на фирмата во работа а плаќањето ќе се врши со средства од Буџетот на општината во рок од 60 дена по приемот на секоја завршена ситуација од целиот проект.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.