Пропагандата на Кју-анон шири невистини дека војната во Украина е „чистење на сатанисти“

252

Наспроти изнесеното во видеото што се споделува во постот, нема никакви тајни апсења на „длабоката држава“, како што приврзаниците на Кју анон теоријата на заговор ја нарекуваат „елитата која од сенка владее со светот“. Исто така, ковид-19 не е измама, туку пандемија од светски размери којашто беше победена поради вакцинацијата, како и мутирањето на самиот вирус во послаби варијанти. Не е точно нити тврдењето дека во Украина има „чистење на сатанистичка змија и дека Путин го чисти тоа зло“. Во Украина има воена инвазија спроведена од страна на Русија, каде што секојдневно се губат човечки животи, а Украина е принудена да се брани

 

 

Рецензираме пост објавен на социјалната мрежа Фејсбук, кој претставува вклучување во живо со видеоврска од страна на човек кој се претставува себеси како „дигитален војник“ односно „приврзаник на кју движењето“ во земјава.

Во видеоматеријалот кој трае 17 минути изнесени се куп дезинформации коишто се очигледни, а кои се однесуваат на претходно споделуваните, класични наративи типични за кју анон теоријата на заговор, која од САД се прошири и во останатиот дел од светот, вклучително и во Северна Македонија.

Со почеток од 7 до 10,50 минута  во видеото (објавено на 12 март 2023 година), лицето кое се претставува под псевдонимот „Мајк Тајсон“ и се ословува себеси како „дигитален војник“, вели:

Утринава добив информација за воена операција која треба да се случи глобално. Стигнува порака на сите мобилни телефони да се повлечете во своите домови, од три до шест часа да бидете дома. Ќе се пренесува сигнал за масовни апсења на елитите и сето тоа ќе се емитува на телевизија. Ќе гледаме. Ова е голема информација и за мене. Неверојатно е, но таа е споделената информација од тие двајца луѓе. Како поминува времето сè повеќе се уверуваме дека дигиталните војници биле во право. Ковид е измама, ова во Украина не е војна туку чистење на сатанистичката змија. Главата ѝ е отсечена, а Путин го чисти тоа зло. Сè повеќе луѓе ја споменуваат информацијата дека всушност се случува големо чистење. Ако некој биде уапсен на улиците од тие војски кои ќе ги бркаат тие лопови, преваранти на владите кои го спроведоа планот за депопулација, вакцините… Тие сите се издадоа. Сите кои го спроведоа ковид планот за депопулација го покажаа своето лице, докторите, полицајците, командирите, го гушеа народот, даваа маски, вакцини, препорачуваа вакцини, сите спортисти кои ги форсираа ковид отровните вакцини за убивање луѓе, владите кои правеа незаконски локдаун, апсеа осудуваа луѓе. Сите се издадени и сите се запишани. Одамна ја добив информацијата дека сите кои треба да се уапсат им се доставува барање сами да се предадат за 24 часа. Ако не се предадат сами, во текот на апсењето после 24 часа имаат право да го убијат ако бега. Така што добар народе, тоа се тие информации кои сакав да ви ги дадам. Ова се само информации кои се шират, а се надевам дека ќе станат реалност на мое големо задоволство. Сигурно е дека Трамп доаѓа и најави смртна казна и големо чистење на сите овие сатанистички лидери и послушниците. Опуштете се уживајте во блискоста на саканите, вели Тајсон во своето обраќање во живо.

Наспроти изнесеното, нема никакви тајни апсења на „длабоката држава“ како што приврзаниците на Кју анон теоријата на заговор ја нарекуваат „елитата која од сенка владее со светот“. Во Северна Македонија на мобилните телефони на граѓаните не пристигнуваат никакви пораки да останат дома поради наводното апсење кое ќе се пренесува на телевизија. На ниедна телевизија не е регистрирано никакво апсење поради наводен план за „големо чистење“.

Сите овие теории уште едно неостварено фантастично сценарио со кое се дефокусира јавноста од настаните кои навистина се случуваат во секојдневието, а за кои професионалните медиуми навситина известуваат. Ковид не е измама туку пандемија од светски размери којашто беше победена поради вакцинацијата, како и мутирањето на самиот вирус во послаби варијанти, како и поради прележаноста на болеста која ја имаа голем број на луѓе. Конспирацијата дека доктори, полицајци и командири гушеле народ, давале вакцини кои биле отровни итн, а сега „се познати, треба да се апсат, а ако не се предадат за 24 часа може да бидат убиени“, се ништо повеќе од неаргументирани фантазии.

Исто така, не е можно ни Доналд Трамп ни некој друг да најавува „смртна казна“ за таканаречени „сатанистички лидери“.

Трамп уште лани отворено преку социјалните мрежи почна да инклинира кон Кју анон теоријата на заговор, на суптилен начин, преку споделување на нивните содржини на социјалните мрежи. Во текстот на Пи Би Ес, од 16 септември 2022 година  се опишани некои наративи коишто се основа на оваа теорија на заговор, од која Трамп не се дистанцира.

Во вторникот Трамп реобјави фотографија од него каде што носи значка со симболот Кју и каде се испишани зборовите: Бурата доаѓа. Во жаргонот на Кју анон теоријата на заговор, „бурата“ се однесува на последната победа на Трамп, кога наводно тој ќе ја добие моќта и неговите противници ќе бидат судени и потенцијално егзекутирани во живо на телевизија

Токму сличен наратив е споделен и во постот што го рецензираме, ама тој е прилагоден на пост-пандемиските услови, односно се кажува дека ќе бидат масовно апсени елитите и на телевизија ќе има пренос од тоа a дека тие учествувале во „ковид измама“.

Не е точно дека во Украина има „чистење на сатанистичка змија и дека Путин го чисти тоа зло“. Во Украина има воена инвазија спроведена од страна на Русија, каде што секојдневно се губат човечки животи, а Украина е принудена да се брани од воената агресија на Путин. Приврзаниците на Кју анон уште од почетокот на воената инвазија од Русија врз Украина ги поддржаа наративите на Русија кои се обиди за оправдување на агресијата.

Белингкет во својата анализа пишува дека многу од каналите на Кју анон движењето во светот, регуларно ја поддржуваат воената инвазија на Русија.

Тие гледаат на војната како напор со кој ќе се сруши интернационалната „кабала“ на која е фокусирана целата теорија на заговор Кју анон. Објавуваат различни идеи за целите на војната меѓу кои и „уништување на американски биолаборатории“ во Украина во кои тврдат дека се создава нова болест слична на ковид, или дека воената инвазија е со цел да се превенира „големиот ресет“ чија наводна цел е да се создаде една светска влада. Сето ова наводно ја прави Русија сојузник во борбата, а инвазијата е наводно за добро, го анализира Белингкет наративот на Кју анон поврзан со Русија и Украина.

Според описот на Белингкет Кју анон е теорија на заговор којашто лажно тврди дека ексамериканскиот претседател Доналд Трамп долго работи на тоа да ги победи „сатанистите, педофилите, длабоката држава и кабалата“ (често употребувани зборови во наративите на промоторите). И покрај тоа што Трамп не е претседател и предвидувањата на кју анон не се остваруваат, конспирацијата продолжува да влече нови следбеници. Освен во САД проширена е во многу држави и од неа се создадени други опасни наративи, како на пример, тие што ги шират антиваксерите. Следбениците на Кју остануваат активни и во теориите на заговор кои се однесуваат на Украина, пишува Белингкет.

Белингкет уште во април 2022 година пишува дека повеќето од поддржувачите на Кју анон го сметаат Путин за херој кој се бори „на страната на Трамп“.

Во септември 2021 година еден од каналите на кју анон во Велика Британија тврдеше дека Путин се бори против сатанистичката кабала, па затоа наводно медиумите го претставувале Путин како „лошиот“.

Секако, ова е пропаганда, односно куп неаргументирани, недокажани и непоткрепени тврдења, кои заеднички придонесуваат во креирањето на една илузија која треба да ја залажува јавноста. Вистината е дека инвазијата на руските сили врз Украина почна на 24 февруари 2022 година кратко после телевизиско обраќање на Путин. Русија ги почна борбените дејствија, ја премина украинската граница и предизвика воена ескалација. Тоа не е поврзано ни со ковид, ни со некаква недокажана „длабока држава“.

Дополнително, не е вистина дека вакцините против ковид-19 биле „отровни“. Целиот состав на вакцините е објавен јавно и не содржи отрови, како што лажно се тврди во постот што го рецензираме.

Поради сите горенаведени факти овој пост го оценуваме како невистинит.

 


Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.