Промени во раководството на ОК Џио Струмица – Владо Милев избран за претседател

2221

На вонредното собрание на Здружението на граѓани ,,ОК Џио Струмица’’ се случија промени во раководството, како што кажаа во интерес на развој и унапредување на клубот. На иницијатива на дел од членовите била донесена одлука да се изврши промена на претседателот, па така на местото на Ѓорги Ѓоргиев за прв човек на здружението а со тоа и на клубот е назначен Владо Милев долгогодишен одбојкар и репрезентативец .

Милев за Дрнка.МК потврди дека е избран за нов претседател на лидерот во македонскиот одбојкарски шампионат ОК Џио Струмица при што подвлече дека промената е во насока и интерес да се унапреди функционирањето на клубот на повисоко ниво.

,, Целите остануваат исти. ОК Џио Струмица да е секогаш конкурентен за титула во шампионатот. Со моето знаење и искуство стекнато низ повеќе одбојкарски клубови но и со искуството со репрезентацијата, сметам дека можам многу да придонесам за развој на клубот со посебен акцент на младите категории. Имаме план и програма за работа. Останува уште да се доекипираме организациски и да почнеме да функционираме како што ни е во план,, изјави Владо Милев кој упати благодарност до веќе поранешниот претседател Ѓоргиев за неговиот ангажман во клубот за неговиот развој напоменувајки дека останува во здружението на граѓани ОК Џио Струмица.

Промената на претседателот на здружението односно на клубот доаѓа во завршницата од одбојкарската сезона во која ОК Џио Струмица атакува на освојување на двојната титула. Лидери се во првенството без ниту еден пораз а пласман обезбедија и во завршницата од Купот. Со оглед на квалитетот кој го поседува ОК ЏИО Струмица, реални се шансите ова сезона да се освои и Шампионската и КУП титулата.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.