500 илјади евра за Дојран од Владата за подобрување на состојбата со езерото и 250 илјади за пречистителната станица

2212

Владата на денешната седница донесе одлука за одобрување средства во висина од 30 милиони денари  или приближно половина милион евра за подобрување на состојбата на Дојранското езеро. Средства се од Буџетот на Македонија за 2020 година кои ќе бидат префрлени на општина Дојран за реализација на проекти кои ќе придонесат за подобрување на квалитетот на водата во езерото.

Според првичните информации средствата ќе се насочат за уредување на крајбрежјето на Дојранското Езеро и отстранување на пределите обраснати со трева и дрвја за да може езерото се прочистува по природен пат. Сето тоа  носи можност и за отворање простор и за нови плажи по брегот кон граничниот премин. Добар дел од парите ќе бидат насочени и за проекти кои ќе произлезат од Акцискиот план за заштита на езерото што општината го носи во соработка со Милиеуконтакт од Скопје.

За неколку месеци општина Дојран треба да го добие Акцискиот план за заштита на Дојранското езеро кој треба да ги утврди можните загадувачи на езерото по што ќе се носат проекти за нивна реализација кои ќе го подобрат биодиверзитетот на езерото.

Инаку Дојран согласно донесениот Буџет за идната година ќе добие околу 250 илјади евра за реконструкција и на Пречистителната станица.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.