Полицијата од Радовиш фати дрвокрадец како превезува огревни дабови дрва во товарно возило без документи

3148

Радовишката Шумска полиција во акција со службеници од Полициската станица од овој град, на патот Радовиш – Владевци фатиле жител од струмичко Сушево како превезува нелегално стекнати огревни дрва во товарно возило марка ,,киа’’. Според информациите, станува збор за околу 1,6 метри кубни, или 2,30 метри просторни огревно дрво. Полицијата потврди дека вчера на стариот пат кај Дукатино било откриено возило во кое имало огревни дрва без документи и по целосно документирање на случајот ќе биде поднесена соодветна пријава против лицето кое управувало со возилото.

,,Вчера на регионалниот пат Радовиш-село Владевци, полициски службеници од Полициска станица Радовиш во содејство со вработени од Шумска полиција Радовиш запреле товарно возило „киа“ со скопски регистарски ознаки, управувано од Г.Д. (46) од село Сушево, струмичко, во кое имало дабови огревни дрва без соодветна документација. Возилото и дрвата се одземени и предадени во Јавно претпријатие „Национални шуми“, подружница Радовиш. По целосно расчистување на случајот ќе биде поднесена соодветна пријава’’ стои во информацијата на МВР

За случајот денеска објави и радовишкиот градоначалник Герасим Конзулов. Тој на својот ФБ профил објави фотографии од акцијата на двете институции . Конзулов во изминатиот период постојано алармира до надлежните институции да спроведуваат контроли со цел да се спречи дрвокрадството на овие простори.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.