Општина Струмица ќе гради Еко парк во II Урбана заедница кај школото Никола Вапцаров

1620

Општина Струмица распиша тендер за изградба на Еко парк во втората урбана заедница во непосредна близина на ООУ ,,Никола Вапцаров’’. Јавната набавка за избор на изведувач трае до 26 ти март а парите за реализација на овој проект се обезбедни од буџетот. Проектираната вредност за ова јавна набавка е 40 илјади евра, но се очекува на тендерот да се постигнат и пониски цени од страна на економските оператори со оглед дека паркот ќе го гради онаа фрима што ќе понуди најниска цена.

Според информациите до кои дојде Дрнка.МК, Еко паркот треба да биде на површина од околу 2500 квадратни метри од кои околу 2100  ќе биде зелена површина а останатиот дел патеки. Паркот  е дел од Програмата за животна средина за зголемување на јавните зелени површини во градот. Во паркот ќе има и урбана опрема клупи за одмор и корпи за отпадоци а се планира да бидат засадени над 500 зимзелени растенија и дрвца.

Според техничката спецификација во паркот ќе има и магнолии, лаванди но и други декоративни растенија и дрвца.  Паралелно истиот ќе биде и со подземна инсталација за наводнување со системи за распрскување. Планирано е да бидат поставени околу 36 поп ап прскалки со домет на распрскување од 3 до 11 метри.

Парцелата, според Деталниот урбанистички план е наменета за спрот и рекреација а во моментов е обрасната со џбунови , дрвја и честопати надлежните интервенираа со чистење. Доколку на тендерот биде избрана фирма – изведувач, се очекува работите на терен за изградба на еко паркот да почнат во втората половина од месец април.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.