Одземена сателитската лиценца на „Раша Тудеј“ во Германија, Кремљ се одмазди со затворање на рускиот сервис на „Дојче Веле“

257

Руските власти донесоа забрана за емитувањето на програмите на германската медиумска корпорација Дојче Веле во земјата, ја затворија канцеларијата, додека на новинарите им ја одземаа акредитацијата за работа во Русија. Одлуката следеше само два дена откако Германија ја одзеде лиценцата за сателитско емитување на државниот руски телевизиски канал „Раша тудеј“ (РТ) на германска територија. Веднаш потоа, YouTube го блокираше германскиот канал RT на својата платформа неколку часа по започнувањето на емитувањата во декември

Руското Министерство за надворешни работи објави дека возвратува со мерки против германските медиуми акредитирани во Русија, како и на Интернет платформите, кои произволно и неразумно ги избришале каналите на РТ. Портпаролката на руското Министерство за надворешни работи, Марија Захарова, во четвртокот изјави дека Русија ќе објави серија мерки против германските медиуми поради забраната за емитување на РТ ДЕ.

Државната новинска агенција РИА Новости го објави планот за делување на руската власт кон германската медиумска компанија Дојче Веле. Покрај затворањето на дописничката канцеларија на Дојче Веле во Москва и одземање на акредитациите на сите вработени во руското биро на ТВ и радио компанијата, најавен е и прекин на сателитското и друго емитување на Дојче Веле. Потоа, покренување постапка за обележување на медиумот како странски агент и забрана за влез во Русија на претставници на германските државни и јавни структури вклучени во одземањето на дозволата за работата на РТ ДЕ. Списокот со имиња нема да биде јавно објавен.

Генералниот директор на ДВ, Петер Лимбургрече дека одлуката на руската влада само ќе ја зајакне решеноста на ДВ да известува за настаните во Русија.

Ова е уште еден знак дека руската влада не е заинтересирана за слободата на печатот и слободата на мислењето. Дури и да треба да ја напуштиме земјата, ќе го интензивираме известувањето за земјата. Ние нема да го игнорираме тоа што се случува во Русија, туку ќе известуваме. И тоа ќе го правиме сè повеќе и повеќе, рече генералниот директор на ДВ, Лимбург, кој реакцијата на Русија ја оцени како „тотално претерана“.

Дојче Веле, кое емитува програма на 30 јазици, вклучувајќи и на руски, најави дека ќе преземе правни мерки.

По забраната, Германското здружение на новинари (DJV) го повика рускиот претседател Владимир Путин веднаш да ја укине и да ги врати акредитациите на новинарите.

Нема никакво оправдување за оваа драстична мерка на цензурарече претседателот на DJV, Франк Уберал, нарекувајќи го чекорот „евтина одмазда“ за одлуката на германскиот регулатор за медиуми.

Од друга страна, Владимир Соловјов, претседателот на Сојузот на здруженија на новинари на Русија, во изјава за РИА новости вели дека Дојче Веле понекогаш ги кршел руските закони, но долги години работеше слободно во Русија.

Прво, Сојузот на здруженија на новинари е секогаш против какви било ограничувања на медиумите, како против ограничувањата што се наметнуваат на нашите медиуми во странство, така и оние што за работата на странските медиуми во нашата земја. Ние сме за слобода на печатот. (Дојче веле – уред.заб.) понекогаш го прекршуваше рускиот закон, ги повикуваше луѓето на митинзи и објавуваше сосема непристојни текстови и карикатури упатени до лидерите на руската држава. Очигледно, дојде време да се стави крај на оваизјавува Соловјов за РИА новости.

На 1 февруари, Комисијата за регистрација и надзор на регулаторите за медиуми на Германија официјално го забрани емитувањето на ТВ каналот РТ ДЕ во Германија, наведувајќи дека ја нема потребната дозвола. РТ, пак, објави дека RT DE Productions ќе ја обжали одлуката на германскиот регулатор на суд.

„Раша Тудеј“ од 16 декември 2021 година емитуваше програма во Германија преку дозвола добиена во Србија.  Дозволата ја издаде Регулаторното тело за електронски медиуми на Србија, кое, повикувајќи се на европското право, ѝ овозможи на руската телевизија да емитува програма во Германија.

Германското регулаторно тело оцени дека српската дозвола е недоволна, бидејќи компанијата што ја произведува програмата РТ ДЕ е со седиште во Берлин и нејзина цел е германската публика.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.