Младите претприемачи стекнуваа нови знаења на студиското патување во Грција преку проектот БИ ИН

191

Во организација на Центарот за развој на Југоисточниот плански регион, а со цел запознавање со можностите за студирање, отворање на бизниси, вмрежување и остварување на соработка во прекуграничниот регион, беше организирано Студиско патување во периодот од 14 до 16 Декември 2022 година на кое учествуваа 19 млади луѓе, сегашни и идни претприемачи од Југоисточниот регион.

Во рамките на тридневното Студиско патување учесниците имаа можност да ги посетат Иновативната зона Александрија, Институтот за истражување при Универзитетот Македонија, самостојната дирекција за иновации и поддршка на претприемништвото на Регионот Централна Македонија, Центарот за истражување и технологија – CERTH, Американското фармерско училиште, Центарот за организирање изложби, конгреси и културни настани во Грција – HELEXPO, Старт ап хабот Октес и Меѓународниот грчки универзитет (International Hellenic University).

Младите претприемачи ја посетија Александрија иновативната зона, каде  Костас Трамацас, преку презентација и дискусија ги запозна со работата и целите на Иновативната зона, но исто така преку дискусија на учесниците ги советуваше како подобро да ги изработат и презентираат своите бизнис идеи и планови пред потенцијални инвеститори, како да изградат свој бизнис и како истиот времено и според потребите на пазарот да го унапредуваат. Во продолжение  учесниците го посетија и Универзитетот Македонија кој важи за еден од поуспешните Универзитети во Грција, при што Џорџ Сиакас со голем ентузијазам и желба им го претстави Универзитетот како и Институтот за истражување кој што функционира во негови рамки. Учесниците имаа можност да ги посетат просториите на Универзитетот и да се запознаат со едукативните програми кој истиот ги нуди.

Вториот ден од Студиското патување започна со посета на просториите на Регионот на Централна Македонија каде Костас Михаилидис преку презентација и дискусија со младите претприемачи, ги запозна со историјата, работата и можностите што ги нуди оваа институција, нејзините цели и обврски во регионот Централна Македонија во Грција. При посетата на Центарот за истражување и технологија – CERTH, учесниците беа пречекани од страна на Др. Никос Кациадакис и преку посета на просториите, презентација и разговор со учесниците, се запознаа со работата на овој институт како и со досегашните постигнувања и истражувања во доменот на екологијата, иновациите и технолошкиот развој, соработката со различни институции и други истражувачки центри во државата, но и надвор од нејзините граници. Од Центарот исто така изразија голема желба за  имплементација на заеднички проекти со Центарот за развој на Југоисточниот плански регион.

Групата учесници го посетија и Американското фармерско училиште која е непрофитабилна едукативна институција, основана во 1904 година, отворена со цел едукација на ученици од Грција, но и од земјите од Балканот. Оваа школа нуди можност за престој и едукација на деца од предшколска возраст до едукација на студенти, од областа на земјоделството, прехранбената индустрија, зачувување на природните ресурси, како и во производството на домашни производи како млеко, јајца и слично со помош на модерна и еколошка технологија. Покрај едукацијата оваа школа врши продажба на своите производи во кампусот, но и надвор од него и тоа им помага на учениците и студентите да се стекнат со искуство и знаење во промоција и продажба на своите производи. На крајот од денот Вики Далкрани при посета на HELEXPO – Центарот за организирање изложби, конгреси и културни настани во Грција сподели информација за саемите и настаните кои што се одржуваат во текот на годината, а кои се од интерес на посетителите.

Последниот ден од Студиското патување беше резервиран за посета на водечкиот стартап хаб  во Солун – OKTHESS, чија цел е развој на локалниот иновациски екосистем и помагање на претприемачи да ги донесат своите иновативни идеи на пазарот. Оваа цел претприемачите имаат можност да ја достигнат преку програма за забрзување која вклучува обука, тренинг, дружење со ментори и пристап до капитал.  Овој стартап хаб и неговите можности на учесниците им го претстави Г-нот Антонио Силиас.

Студиското патување го заокруживме со посета на Меѓународниот грчки универзитет, кој нуди програми кои се изучуваат исклучиво на англиски јазик. Како државен универзитет, сите доделени дипломи се акредитирани од Владата и се признати во Европската Унија и на меѓународно ниво. UCIPS има за цел да се развие како една од најистакнатите истражувачки институции во Европа, привлекувајќи веќе силен меѓународен академски кадар и извонредни студенти од различни земји во светот. Со создавање, комуникација и примена на знаење, универзитетот има за цел да го инспирира секој член на својата заедница и да ги едуцира идните лидери. Работата, успесите и факултетите за општествени и природни науки на овој универзитет на учесниците им ги претстави Проф. Ели Влахополоу.

По завршувањето на оваа студиско патување, учесниците истакнаа дека се презадоволни од локациите кои што ги посетија, но и од споделените искуства и знаења од страна на домаќините на овие институти, универзитети и другите институции. Покрај тоа што ова патување имаше едукативен карактер, им овозможи на учесниците да комуницираат меѓу себе, да се дружат, но и да ги прошират своите видици со цел создавање на подобра и поуспешна иднина.

Оваа активност беше овозможена преку проектот „Деловен екосистем како интегриран систем – БЕ ИН” финансиран преку Интеррег ИПА Програмата за прекугранична соработка со Грција.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.