Македонија го доби својот 24-ти Ротари клуб, откако вчеравечер беше отворен клубот Скопје – Исток

183

На отворањето беше присутен и гувернерот на Ротари Дистриктот 1912 (Словенија и Македонија), Душан Петеркович. „Моја работа, како гувернер, е да ги водам клубовите кон исполнување на целите на меѓународниот претседател на Ротари Интернешнл. Негова главна цел, годинава, беше да се зголеми членството. Нашиот Дистрикт 1912, во Македонија денес, брои 24 клубови, откако го формиравме и „чартериравме“ Скопје – Исток. Во Словенија имаме 52 клубови, односно во двете држави имаме 76 ротари клубови и 1617 членови“, истакна гувернерот Петеркович.

За првиот чартер претседател на Скопје – Исток, Глигор Михаиловски, не постои поголемо задоволство од приемот во семејството на Ротаријанците, како дел од милионско семејство на поединци, кои преку клубови, дистрикти и зони се здружени меѓу себе.

„Ротари клубот Скопје – Исток стана дел од Дистриктот 1912 Словенија-Македонија и доби можност за раст и развој на сцената на меѓународно признатата филантропија. Пред нас е пат на кој треба да бидеме трпеливи, да учиме едни од други, да работиме едни со други за подобрување на средината во која живееме, да помогнеме со проекти на заедницата од која доаѓаме, да соработуваме со сите организации и поединци кои ја делат нашата мисија на посветеност, солидарност и помагање. Затоа што, сите сме под исто небо, сите не грее исто Сонце. Ќе се стремиме секој ден горди да го дочекаме Сонцето од Исток знаејќи дека претходниот ден сме ги направиле сите можни напори за подобро утре“, рече Михаиловски во своето обраќање.

Во својот мандат, гувернерот Петеркович ги посетил сите клубови во двете држави, за што помогнал и координаторот на Сојузот на ротари клубови за Северна Македонија, Сашко Целаковски. Ротаријанците планираат и спроведуваат широк спектар хуманитарни, образовни и културни програми кои ги збогатуваат животите на луѓето во нивната непосредна околина, како и во глобалната заедница. „Сакам да го потенцирам проектот кој веќе се реализира во Словенија, а тоа е да бидеме прва држава во светот без пластични шишиња. Овој проект треба да се реализира и во Северна Македонија (https://siol.net/digisvet/novice/ali-bo-sloveniji-uspelo-postati-prva-drzava-na-svetu-576575). Исто така, согласно ситуацијата, како Дистрикт дониравме повеќе од 60.000 евра помош за Украина и набавивме санитетски материјал и медицински апарати за да помогнеме на бегалците од Украина во Словенија“, вели гувернерот Петеркович.

Ротари Интернешнл (Rotary International) е организација на глобално поврзани бизнисмени и професионалци од различни професии. Членовите на Ротари клубовите ширум светот се грижат за добротворни филантропски активности, промовираат високи етички принципи и стандарди во нивните професии и помагаат во ширење на добрата волја и мирот низ светот.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.