Сите светски медиуми и агенции под назнаката итно или „breaking news“ ја пренесоа веста за оружениот напад во градот Ижевск во руската Република Удмуртија, во училиштето 88, при што меѓу десетината загинати има и повеќе деца. Но, информациите од ваков тип оружени напади, во контекстот на руската агресија на Украина, на референдумот што се одвива во окупираните региони Доњецк, Луганск и Херсон, и на севкупната состојба меѓу Русија и Западот, многу бргу можат да станат дезинформации и да се претворат во плодна почва за пропагандни активности
Додека се пребројуваат жртвите и билансот, за што македонските граѓани можат да се информираат и на агрегаторот на вести Тајм.мк и преку традиционалните и онлајн медиумите, вреди да се напомене како известуваат западните медиуми кои внимаваат на новинарските стандарди и што тие објавуваат за настанот.
Британскиот јавен сервис Би-Би-Си попладнево јави дека се убиени најмалку 13 луѓе од кои седум се деца, во нападот во училиште каде учат околу 1.000 ученици, при што се ранети преку дваесет лица. Убиените возрасни се припадници на безбедносните сили, но и двајца се наставници. Повикувајќи се на комбинирани извори – руски официјални власти и нивните соопштенија и медиуми, Би-Би-Си јавува дека напаѓачот се самоубил и дека бил поранешен ученик во тоа училиште.
Локален пратеник, пренесува Би-Би-Си, го именувал и убиениот како Артем Казанцев (Artem Kazantcev). Обајвувајќи први снимки од местото на истрагата, руските официјални истражни органи покажале и тело на убиен човек во качулка и во маица со нацистички симболи.
Слична ваква приказна објавува и британски Гардијан. Сторијата ги има истите податоци, со тоа што Гардијан потсетува дека „во последните години имало повеќе напади низ Руската Федерација на училишта“. Притоа се потсетува на нападот во Казан во Татарстан во 2021 година, кога беа убиени седум ученици и двајца службеници во училиштето. Тогаш напаѓач било 19 годишно момче, кое пред нападот соопштило на социјалните мрежи дека „се чувствува како Господ“ и дека „планира да убие многу луѓе“.
Германскиот јавен сервис Дојче Веле во првичните информации ги содржи овие податоци, потсетува дека оружените напади во Русија порано биле реткост, но зачестиле последните години и ја пренесува изјавата на рускиот претседател Владимир Путин по последниот сличен ваков напад пред денешниот:
Рускиот претседател Владимир Путин по последниот инцидент од ваков вид зборуваше за феномен увезен од САД и ги критикуваше ваквите насилни дела како пропратен ефект на глобализацијата – наведува Дојче Веле.
Европската телевизиска мрежа Euro news, ги покрива сите овие податоци, но покрај споменувањето на оружениот напад во Казан, наведува дека 6 месеци подоцна на 21.09.2021 имаше уште еден напад врз објектот на државниот универзитет во Перм, кога загинале 6-мина студенти и десетина биле ранети, како и на нападот врз средно училиште на Крим во 2018 година, кога 18 годишен ученик уби со експлозивна направа најмалку 19 луѓе, а десетици беа ранети или повредени.
И руските медиуми известуваат од час во час за настанот. Независниот он-лајн медиуми Медиа Зона ги лиферува информациите од минута во минута, наведувајќи дека напаѓачот се самоубил. Овој медиум во секоја сторија од настанот објавува и видео материјали, било да ги емитуваат други руски медиуми или граѓани, било да се емитувани од руските истражни органи.
Сите овие напади, вклучувајќи го и денешниот во Ижевск, беа извршени од поединци, но реченицата цитирана од Дојче Веле за зборовите на Путин, ја потврдува можноста дека и овој настан може да послужи за ширење на дезинформации или пропагандни пораки.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.
Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.
