Контраспин: За мобилните телефони на прaтениците, сепак ќе се брцне во џебот на граѓаните

106

Средствата коишто Собранието ги троши за сите свои потреби, ги покрива буџетот на државата којшто се полни од даноците кои ги плаќаат граѓаните. Службените телефони на пратениците и на собраниската служба, но и сите нивни месечни плати и останати примања, се покриваат со јавни финансии кои ги обезбедуваат граѓаните

Пишува: Симона Атанасова

Претседателот на Собранието Талат Џафери, при гостување во емисијата „24 анализа“ на крајот на интервјуто даде изјава во којашто ја спинува вистината.

Спин: Има јавно објавен договор и јавно објавена јавна набавка. Јавна набавка е за обезбедување телефонија за работа на Собранието, 300 луѓе служба, 120 луѓе пратеници. Тоа не е купување на телефони туку е субвенција кога ќе заврши договорот, објаснуваше Џафери.

На дополнително прашање од новинарката колку граѓаните ќе плаќаат плус пари, Џафери одговара:

Не плаќаат граѓаните, плаќа буџетот.

[Извор:„24 анализа“(1:05:40 во видеото); Датум: 17.02.2022]

Контраспин: За време на емисијата, новинарката го праша спикерот Талат Џафери за набавката на мобилни телефони за пратениците, за којашто се дигна голема врева во јавноста. Џафери во одговорот рече дека тоа „не го плаѓаат граѓаните, туку плаќа буџетот“, што е класичен спин.

Да, вистина е дека  парите за набавка на мобилни телефони за Собранието ќе се  обезбедат од буџетот. Но, не е вистина дека граѓаните нема да ги плаќаат овие средства. Зошто? Затоа што буџетот, се полни од пари на граѓаните. Така што, реалноста е дека и за оваа јавна набавка ќе се брцне во џебот на граѓаните.

 

Како се финансира Собранието?

Собранието е буџетски корисник. Под буџетски корисници се подразбираат корисниците на средства од буџетот на државата од областа на законодавната, извршната и судската власт. Тоа се Собранието, Владата, Претседателот на државата, други органи во извршната власт, судството како и Уставниот суд.

Во Буџетот на дражвата за 2021 година стои дека вкупниот буџет за Собранието на Република Северна Македонија изнесусува 625.400 илјади денари, дека бројот на вработени е 396 и дека оперативните расходи по вработен (во илјада денари) се 1.333.

Собранието има Буџетски совет кој според Законот за Собрание ги има следниве надлежности.

Член 27
– утврдува стратешки приоритети на Собранието за наредната година и нивно вклучување во Буџетот на Република Македонија со предлагање на посебни програми и потпрограми,
– дава упатства и насоки за подготвување на предлогот на буџетските барања и потребите за работа на Собранието,
-предлага на Владата на Република Македонија во соработка со Министерството за финансии максимален износ на средства за Собранието за наредните три фискални години
Член 28
(1) Буџетскиот совет во постапката за изготвување на Буџетот на Република Македонија врши постојани консултации и усогласувања со Министерството за финансии и со Владата на Република Македонија, во врска со финансиската проекција на потребни средства на Собранието и се грижи за финансиските потреби на Собранието.

Како се формира буџетот на државата?

Наједноставно кажано, граѓаните го полнат буџетот на државата кој потоа во текот на една година се распределува на буџетските корсници за нивните потреби односно за нормално функционирање на државата.

Приходите во буџетот се составени од даночни приходи и придонеси, неданочни приходи, капитални приходи и донации. Даночни приходи се: данок на додадена вредност, данок на доход, данок од добивка и од капитални добивки, придонеси за социјално осигурување, домашни даноци на стоки и услуги, данок од меѓународна трговија и трансакции (царини и давачки) и такси на користење или дозволи за вршење на дејност.

Во буџетот за 2021 година, далеку најголемо учество имаат даночните приходи коишто се пари на граѓаните. Од 212.630 милиони денари вкупен приход, од даночните приходи се 186.282 милиони денари.

Од ова произлегува дека средствата коишто Собранието ги троши  за сите свои потреби, ги покрива буџетот на државата којшто, пак, се полни од даноци кои ги плаќаат граѓаните. Телефоните на пратениците и на собраниската служба, но и сите нивни месечни плати и останати примања, се покриваат со јавни финансии кои ги обезбедуваат граѓаните. Фактичката состојба вели дека и овие телефони ќе ги платат граѓаните, а тврдењето на Џафери дека нема да ги платат граѓаните, туку ќе „плаќа буџетот“ е класичен спин.


Овој напис е изработен во рамките проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.