Кире Ричлиев: ОК Џио Струмица создаде силен состав за нови титули и успех во Евро Челенџ Купот

723

Одбојкарите на ,,Џио Струмица’’ ги почнаа подготовките за новата сезона во која основна цел ќе им биде освојување на националната двојна круна но и постигнување на што подобри резултати на европска сцена. Тренажниот процес овие денови се реализира во градскиот парк во Стумица но и во Арена Фитнес, каде одбојкарите физички се подготвуваат за престојните техничко тактички комбинации во сала.

Според најавите од Кире Ричлиев кој деновиве го продолжи договорот со ОК Џио и ќе биде шеф на стручниот штаб во септември, се планираат и одигрување на контролни средби со екипи од Албанија и Србија но се зависи од ситуацијата со пандемијата која во моментов ги диктира условите за одигрување на било какви мечеви.

,,Мислам дека создадовме силен состав кој треба да ја одбрани двојната круна во домашниот шампионат и успешно да ја презентираме струмичката и македонската одбојка во Евро Челенџ Купот. Ги вративме искусните репрезентативни играчи Милев и Михаилов а ги задржавме и останатите домашни играчи. Како клуб се пријавивме во Челенџ Купот и при крајот на месецов ќе ги дознаеме противниците. Се надевам дека ќе имаме среќа при извлекување на противникот’’, ни изјави стратегот Кире Ричлиев

,,Џио Струмица’’ во меѓувреме ги продолжи договорите со Ристо Николов, Марјан Урдов, Тиме Ричлиев, Славе Наков, Филип Николовски. Прволигашот Џио планира да ја позиционира одбојката како главен спорт во Струмица. Во изминатиот период  осетно се засилија и во стручниот штаб, кој паралелно ќе работи и со младинските погони за да се потврди дека овој град е најголемиот расадник на квалитетни одбојкари во Македонија.

,, Осетно го засиливме и стручниот штаб. Младинската екипа ќе ја водат Михаилов и Попов. Пионерите Костадин Ричлиев и Арабаџиков. Кај сениорите ќе ми помага Милев кој истовремено ќе ја врши и функција спротски директор а како тренери и статистичари ќе бидат вклучени Ване Ристоманов и Јане Попов. Во сите млади категории очекуваме финални турнири и формирање на нови групи на пионери одбојкари’’, потенцираше за Дрнка.МК- Кире Ричлиев

Инаку во ОК ,,Џио Струмица’’ во тек се уписите на нови играчи за деца родени 2012 и поголеми. Уписите и тренинзите во овој клуб се бесплатни каде секој играч добива опрема за тренинг. Инаку струмичкиот прволигаш во последната сезона која се прекина беше втор зад Вардар но со оглед дека не се заврши првенството, тие и понатаму се актуелни Шампиони и освојувачи на одбојкарскиот КУП.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.