За кои улици и патишта добија готови проекти Василево, Богданци, Конче, Ново Село и Босилово преку Светска Банка

1500

Општините Василево, Босилово, Ново село, Богданци и Конче денеска ги добија проектните документации за изградба на нови локални патишта и улици за кои аплицирале преку Проектот за подобрување на општинските услуги. Станува збор за проект што Министерството за финансии го реализира со Светска Банка која одобри околу 1.1 милион евра, со кои за општините се изработени готови проекти со кои ќе аплицираат за средства за нивна релизација.

Општина Василево доби готови проекти за три улици, сите во општинскито центар. Станува збор за техничка проектна документација за улицата од селската црква до училиштето Гоце Делчев, за улицата со пат од паркот кај Домот на културата до клучката кон Пиперево и Добрејци и за улицата од повеќенаменското игралиште до каналот

Општина Богданци доби комплетна техничка документација за изградба на три улици во Богданци. Како што информриаа од ова општина, изработени се проекти за улиците Маршал Тито, Изворски и Петар Мусев за кои сега ќе се бараат средства за нивна реализација

Општина Конче доби готови проекти со техничка докуметација и елборати за изградба на централната улица во Ракитец во должина од 2 километри, улица во населеното место Долно Липовиќ, но и улица со пат од Конче до Лубница.

Општина Ново село доби готова техничка документација со извршена ревизија за улицата Струмица во општинскиот центар но и за улици во населените места Мокриево и Колешино. Од ова општина информираа дека со готовите проекти ќе аплицираат за изградба во министерството за транспорт и врски преку грант од Меѓународната банка за обнова и равој.

Преку проектот на министерството за финансии за подобрување на општинските услуги доби и Општина Босилово . Таа доби комплетна техничка документација со сите елаборати за изградба на локалниот патен правец Секирник – Штука во должина од 2,5 километри.

Со добиените проекти финансирани од Светска Банка преку Министерството за финансии, општините сега може да аплицираат пред домашни и странски фондови за обезбедување на потребните средства и реализација на посочените улици и патишта, или пак да ги реализираат од сопствените Буџети. Преку овој проект за подобрување на општинските услуги, комплетни проектни документации ќе добијат вкупно 78 општини за изградба на околу 270 локални патишта и улици.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.