Ерменија е силна селекција но ќе одиме на победа, кажаа Милевски и Елмас пред мечот во Струмица

553

Најдобрите македонски фудбалери очекуваат победа на утрешниот контролен натпревар против селекцијата на Ерменија, кој се игра утре во Струмица на стадионот „Благој Истатов“ со почеток во 15 часот.

„За натпреварот против Ерменија ќе им дадеме шанса на фудбалерите во составот кои треба да го потврдат потенцијалот во репрезентацијата. После исцрпувачкиот меч во Прага ќе видиме колку фудбалерите чувствуваат физички замор. Нема повредени и пред натпреварот ќе одлучиме кој ќе започне. Контролниот меч против Ерменија, која е квалитетна селекција и одигра одлични квалификации е одлична можност за сите нас да го провериме потенцијалот со кој располагаме. Шанса ќе добијат сите, но ќе одлучиме за минутажата на фудбалерите. Оваа селекција секогаш оди на победа, така ќе биде и утре против Ерменија“, изјави Милевски.

Еден од столбовите на нашата репрезентација, Елиф Елмас, е оптимист во пресрет на дуелот против Ерменија и како и секогаш, најавува атак на победа.

„Играме натпревар против еден доста добар противник како што е Ерменија. Очекувањата се секогаш кога играш за репрезентацијата да дојдеш до победа. Исто како и на претходниот натпревар, ќе излеземе сите заедно, сплотени, ќе одиграме добар меч и се надевам дека ќе победиме“, изјави репрезентативецот на Македонија, Елиф Елмас.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.