Дојран е безбедна туристичка дестинација, издавачите на соби да се регистрираат за ваучерите, апелираа Ангов и Јаневски

1775

Првиот човек на општина Дојран заедно со директорот на Агенцијата за развој и поддршка на туризмот Љупчо Јаневски, одржаа средба сопствениците на сместувачките капацитети како да менаџираат во услови на пандемија со коронавирусот. На средбата Јаневски истакна дека Дојран од аспект на коронавирусот е безбедна туристичка дестинација бидејки нема позитивни случаи и апелираше до издавачите и понатаму да ги почитуваат мерките и препораките.

Јаневски им објасни на издавачите на соби, дека треба да се придржуваат кон мерките и протоколите за работа, со цел и понатаму Дојран да биде безбедна туристичка дестинација во услови на коронакриза. Побара од нив да се фокусираат на домашните гости бидејки после 15 јули ќе се стават во функција ваучерите но и да ги задржат и понатаму транзитните туристи од Србија.

Најголем акцент беше ставено на искористување на ваучерите за туризам за што од општината и од Агенцијата апелираа до сите издавачи на соби кои се категоризирани, да се регистрираат на платформата Дома си е дома за да може кај нив да престојуваат гости со ваучери за туризам. Државата издаде околу 115 илјади ваучери што значи инвестирање во домашниот туристички сектор од 15 до 17 милиони евра кажа Јаневски.

Дел од сопствениците се пожалија дека не можат да се регистрираат при што Ангов им укажа дека како општина им стои на располагање да им помогнат. Во општина Дојран има околу 230 категоризирани мини сместувачки капацитети до 20 легла. Тие кажаа дека се подготвени за новата сезона и ќе се придржуваат кон мерките и препораките но дека тоа зависи и од гостите.

Градоначалникот на Дојран Анго Ангов информираше дека лани по основ на туристичка такса се собрани околу 2 милиони и 200 илјади денари – пари кои ова лето ќе се инвестираат во уредување на појасот од вилата на Владата до амфитеатарот со нови содржини.

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.