Грип или ковид? Постојат тестови кои ја детектираат разликата меѓу овие две инфекции

23

Мултиплекс панел тестот во исто време детектира специфични генски секвенци за докажување на присуство на коронавирус и специфични генски секвенци од вирусите на сезонските грипови А и Б инфлуенца. Во приватните лаборатории овој панел не е никаква новина, постои речиси една година и чини околу 4 илјади денари. На Клиниката за пулмологија веќе четири години постои мултиплекс ријал тајм ПЦР панел, со кој може со еден брис да се детектираат 33 патогени микроорганизми, партиципација за него е 2.300 денари. Но, се тестира само во случај ако клиничка слика е многу слична, односно таму каде, на пример, има клиничка слика со температура, респираторни симптоми и не се знае дали е ковид, дали е грип, дали е аденовирус. „Вистиномер“ се обрати до Министерството за здравство со прашање дали се размислува да се набават такви брзи тестови за детекција и на грип и на ковид истовремено, но не добивме одговор. Нашата проверка во аптеките покажа дека во земјава не се достапни брзи тестови кои истовремено дететектираат и грип и ковид

Пишува: Мирослава БурнсВо текот на есенскиот период, кога природно се шират различни типови на инфекции меѓу граѓаните, се поставува и прашањето како да се диференцираат грипот и ковидот, со оглед на тоа што двете инфекции во еден дел имаат слични симптоми. Откако американскиот Центар за контрола и превенција на болести препорача до крајот на 2021 година лабораториите во државите во светот да пристапат кон воведување нови тестови, такви кои можат во исто време да откриваат и Сарс Ков 2 и инфлуенца (грип), се појавија и низа дезинформации дека досегашните ПЦР тестови, всушност, грешно го детектирале грипот небаре е ковид. Но, ова не е точно. Препораката на Центарот за контрола и превенција на болести се однесува на специјален тест кој регистрира два различни вируси. Со тестот што го препорачуваат оттаму, ќе се испитува дали пациентот има ковид, дали има грип или можеби ги има и двата вируса што, исто така, е можно!„Вистиномер“ се обиде да дознае дали вакви панели за детекција на различните вируси постојат во земјава. Во приватните лаборатории овој панел не е никаква новина и постои речиси една година. За цена од околу 4 илјади денари, со специјален таканаречен мултиплекс панел, се докажува молекуларно присуство на повеќе типови на вируси кои заедно со коронавирусот може да предизвикаат тешка респираторна клиничка слика, а резултатите се готови за помалку од 24 часа. Мултиплекс панел тестот во исто време детектира специфични генски секвенци за докажување на присуство на коронавирус, и специфични генски секвенци од вирусите на сезонските грипови А и Б инфлуенца.Медицинските професионалци со кои контактиравме велат дека особено во пресрет на сезонските настинки и грипови, кога симптомите на пациент со ковид се слични со оние на други вируси, важно е докторот добро да знае кој вирус е причинител на инфекцијата за да може соодветно да се третира пациентот. Секоја покачена телесна температура не е ковид, но без соодветно тестирање не може да се направи разликата.

Во паника, кога секој пациент со температура се третира ко суспектен за ковид-19, од голема полза е навремено и точно дијагностички да се утврди кој е причинителот на таа симптоматологија, која не секогаш е последица настаната после Ковид-инфекција, вели Среќко Рајовски, шеф на лабораторија за молекуларна дијагностика во „Аџибадем Систина“.

Тестот се изведува со земање брис од нос и од грло. Според инфектолозите, особено важен е овој тест затоа што сезонскиот грип и ковид имаат во некои случаи слични симптоми, па потребно е рано да се дијагностицираат причините и да се реагира соодветно.

Директорот на Клиниката за пулмологија, доктор Дејан Докиќ, вели дека на неговата клиника веќе четири години постои метода, односно мултиплекс ријал тајм ПЦР панел, со кој може со еден брис да се детектираат 33 бактерии или вируси коишто се причинители на симптоматологијата.

Ние на клиниката имаме тестови, методата се вика real time мултиплекс ПЦР на 33 патогени микроорганизми. Главно тоа се вируси, меѓу кои се и МЕРС и Сарс Ков 2 и некои атипични бактерии. (Напомена: верзијата на овие тестови, која го вклучува и Сарс Ков 2 вирусот е од понов датум, се разбира, не од пред 4 години, зашто овој вирус тогаш не постоеше – н.з.). Се зема брис од нос и од грло, може да се земе и од долните дишни патишта и се става во машината и за еден час имаме резултат од ПЦР кој детектира дали имаме вирус, кој вирус е, или бактерија и која бактерија е. Ако има бактерија дали поседува ген на резистенција за да не дадеме некои лекови, ако има резистенција. Тоа се прави на сите пациенти кои имаат знаци за температура и некаква вирусна инфекција. На друг начин не можеме да ја дијагностицираме причината. Партиципација за ова е 2.300 денари. Во приватното здравство се тестира вака ако сака, а во државното здравство е по индикација. Само таму каде има клиничка слика, на пример, температура, респираторни симптоми и не се знае дали е ковид, дали е грип, дали е аденовирус. Има клиничка слика што е многу слична, ни изјави доктор Докиќ.

Тој напоменува дека не секоја температура со респираторни симптоми е ковид.

Некогаш се дијагностицира друг, на пример респираторен синцицијален вирус. Точно разграничуваме од што се тие симптоми. Ако е ковид пациентот се префрла во ковид одделение, а ако нема ковид во друго одделение. Ако е вирус не се дава антибиотик, ако е бактерија со ген на резистенција нема да се даде одреден антибиотик туку друг. Автоматски има брза дијагноза, се штеди на лекови. Само според клиничката слика не може да се знае дали е вирус или бактерија. Непотребно така може да се даваат антибиотици и да се развиваат резистентни соеви на бактерии и второ, зошто да му се дава лек на пациетнот кој не му е потребен. Антибиотикот не треба да се дава ако нема бактериска инфекција. Овој панел на клиниката го имаме 4 години. На други клиники го нема, го има само во приватните молекуларни лаборатории,  посочува доктор Докиќ

Тој појаснува дека ваков тест се прави, на пример, пред да се одлучи дали пациентот да се хоспитализира и каде. Значи, се прави амбулантски, кога не може да се разграничи врз основа на клиничката слика што е причинител на симптомите и на таков начин се идентификува предизвикувачот на симптомите.

Засега нема најави дека во пресрет на есенскиот период ќе се воведат тестови што детектираат и грип и ковид во аптеките. За ова веќе има препораки и сугестии од лекарите. Доктор Нико Беќаровски од Клиниката за токсикологија им порача на здравствените власти да ги набават овие брзи тестови, кои само со еден брис ќе може да идентификуваат дали станува збор за грип или за ковид.

Со доаѓањето на есента и на зимата оваа година, неминовно ќе не заплисне и сезонскиот грип. Затоа, додека цените на тестовите уште не се скапи на светската берза, веднаш набавете ги брзите комбинирани антигенски тестови Covid/InfluenzaA/B Combo test, со кои релативно евтино и во временски краток рок ќе може да веднаш да дијагностицираме болни од ковид-19 и сезонски грип. За еден месец можеби ќе биде предоцна, вели доктор Беќаровски.

„Вистиномер“ се обрати до Министерството за здравство со прашање дали се размислува да се набават такви брзи тестови за детекција и на грип и на ковид истовремено, но не добивме одговор.

Нашата проверка во аптеките покажа дека во земјава не се достапни брзи тестови кои истовремено дететектираат и грип и ковид. Но, достапни се брзи тестови за детекција на ковид. Во секој случај, во приватните лаборатории и на Клиниката за пулмологија, постои можност со еден брис да се детектира дали станува збор за ковид или за грип, како што препорачува Центарот за контрола и превенција на болести на САД.

Овој напис е изработен во рамките на Проектот за брзо справување со вакциналните дезинформации, имплементиран од Фондацијата МетаморфозисТој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.