Гевгелиски Мултус дел од програмата „Transformation” за препознавање токсични наративи во медиумите

140

Медиумите се служат со различни начини на оформување на јавното мислење. Особено со појавата на социјалните медиуми и можноста секој да го искаже своето мислење, се појавија многу нови форми  на приказ на информации, но и на манипулации. Во последно време почнуваат, со правни и етички кодекси и регулативи, да се регулираат агендите на официјалните медиуми. Но, социјалните медиуми сѐ уште се извор на голем дел од проблемите и токсичните наративи, кои потоа остануваат уште поизразено во социјалниот живот.

Токсичен наратив е начин на презентација на информација или состојба која наштетува на лице, група или цела заедница. Дискриминира, стигматизира или навредува и повредува.

Доста често по нашите медиуми среќаваме вести кои известуваат за жени жртви на насилство. Најчесто физичко насилство и предизвикано од партнер на жртвата. Но, жените се соочуваат со разни видови на насилство – довикување на улица, навреди поради физички изглед, сајбер булинг, психичко малтретирање… Низ изминативе години се појавија и проширија „јавни соби„ кои беа создадени исклучиво за понижување, иссмевање и злоупотреба на жени и нивни фотографии и лични податоци. Неретко случаите се губат во правнииот систем, одговорност ретко има, а тие „соби“ сеуште живеат во интернет просторот некаде. Животи се уништени, големи трауми се претрпени.

И во речиси сите случаи, по појавувањето на веста на социјални медиуми, од коментари, се прозива жртвата како виновна. Тој токсичен наратив во македонскиот менталитет ја прозива жртвата за виновна за тоа што и се случило.

Како контра-наратив на овој токсичен наратив, Лилјана Танчева од Центар Мултус од Гевгелија, со пријателите Азра Абази – дефектолог подготвија мала кампања со видео прикажување на погоре опишаната состојба.

„Како дел од програмата „Transformation” која нашите пријатели од организацијата Inspire од Чешка ја спроведуваат под капата на Erasmus+, која во два тренинг курсеви и изработка на трудови, истражувања и анализи обучуваше над 50 млади луѓе од 10 земји во Европа, учевме да препознаваме токсични наративи во медиумите и социјалниот живот, кои делуваат на оформување на јавното мислење. Секоја земја со своите проблеми, изработи кампања која ја презентира во јавноста од агол кој треба да го прикаже токсичниот наратив со контра-наратив. Ние ја одбравме состојбата со жените – жртви на насилство во нашата земја, бидејќи секојдневно се соочуваме со вакви вести, но и со лошите коментари дека „сами си го бараат“. Никој не си бара да биде малтретиран на било кој начин. Овде никој не ја спомува токсичната машкост, која ескалира во насилство, но за тоа во друга прилика.“ – изјави Лилјана Танчева од Мултус.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.