Првачињата во школо а другите да следат онлајн настава, предлог на Комисијата за заразни болести

1364

Од први септември во училиште да бидат само првооделенците додека другите ученици наставата да ја следат онлајн. Ова е предлогот на Комисијата за заразни болести што го соопшти министерот за здравство Венко Филипче но сеуште нема конечна владина одлука по кој модел ќе се одвива наставата за следната учебна година.

„Став на комисијата за заразни болести е наставата да почне да се одвива онлајн, освен во првите одделенија во коишто е неопходно физичко присуство на децата. Во оваа ситуација, стравуваме дека транспортот од и до училиште, комуникацијата на децата на одморите, за време на влез во училиштето, во заедничките простории, во ходниците, во есен во која едноставно не знаеме со што се соочуваме, што може да нѐ чека, не само ние, ниту една земја во Европа, ќе биде многу ризично да дозволиме децата да се вратат без никакво ограничување во затворена просторија“, велат од Министерството.

Владата пак попладнево соопшти дека на денешната седница усвоила Информација со План за одржување на наставата но таа ќе била споделена со Комисијата по што ќе ја донесат конечната одлука во врска со моделот како ќе се реализира учебната 2020/2021 година.

„На денешната 80-та седница, Владата ја разгледа и усвои Информација со План за одржување на наставата во училиштата во учебната 2020/2021 година на Министерството за образование и наука, и донесе заклучок таа да биде споделена со Комисијата за заразни болести, по што врз основа на мислењето на Комисијата ќе биде донесена одлука за моделот за организирање и спроведување на наставниот процес во основните и средните училишта“, соопшти Владата.

Министерот за образование Арбер Адеми за Алсат М кажа дека моделите што веќе ги подготви Министерството за образование ќе бидат разгледани уште еднаш на следниот состанок на Комисијата за заразни болести. Според него новата учебна година треба да започне со физичко присуство во училиштата, во зависност од епидемиолошката состојба во земјава.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.