Во понеделник ќе почне со работа модуларната ковид болница во Гевгелија со капацитет од 15 легла

279

Во понеделник на 1 февруари ќе биде ставена во употреба модуларната ковид болница во Гевгелија. Вака најави директорот на Општата болница со проширена дејност, д-р Митко Крџев според кого во истата ќе се врши прием на пациенти позитивни и суспектни на ковид-19, тестирање со брзи и ПЦР тестови, преглед и тријажа на пациенти, третман во дневна болница и стационар.

Новата модуларна ковид болница е со површина од 400 квадратни метри. Има  посебен влез за персоналот. Посебен влез и за прием, евиденција, преглед, тестирање на пациенти и одредување на терапија. Во последниот сегмент има соба за изолација и стационар за хоспитален третман до максимум 15 пациенти.

Како што информираше директорот Митко Крџев, со отворањето на ова болница, постојните пунктови за земање брис, дневната болница за непотврдени и ковид пациенти се затвораат и пренаменуваат. Одделот за интерни болести, кој досега беше пренаменет за болнички третман на позитивни пациенти, од 1 февруари продолжува со нормална работа, односно да згрижува пациенти со интернистичка патологија.

За последното деноноќие во Гевгелија се регистрирани нови 8 позитивни на ковид-19. Таму според здравствените власти во моментов има 104 активни случаи. Од почетокот на пандемијата во Гевгелија одо овој вирус заболеле 986 лица, 868 оздравеле а 22 лица починале.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.