Во Гевгелија ќе има комисија за остварување на правото за надоместок за помош и нега од друго лице

816
Во Општата болница со проширена дејност во Гевгелија, наскоро, за првпат ќе започне со работа Лекарска комисија за остварување на правото за надоместок за помош и нега од друго лице. Како што информираше денеска директорот на Општата болница Гевгелија, доктор Митко Крџев, добиено е Решението за почеток на работа на оваа комисија, која е составена од три члена и која ќе издава конзилијарно мислење и наод за пациентите од Гевгелија Богданци, Дојран и Валандово.
Членовите на комисијата деновиве беа во Струмица за да се запознаат со протоколите за работа, а во моментот, изјави доктор Крџев, се прави проценка со која динамика ќе работи комисијата, Имено, матичните лекари ќе прават преку системот Мој термин закажување на барањата на пациентите кои сакаат да го остварат правото за надоместок за помош и нега од друго лице.
Со формирањето на оваа Комисија во Гевгелија, потенцираше Крџев, ќе се намали периодот на чекање за гевгеличани, богданчани, валандовчани и дојранчани кои треба да го остварат правото на надоместок за помош и нега. И нема повеќе да патуваат во друго место и да бидат изложени на дополнителни трошоци.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.