Во Богданци ќе бидат поставени над 700 сообраќајни знаци, табли и опрема за поголема безбедност на граѓаните

1231

До крајот на годинава во Богданци треба да бидат поставени околу 700 сообраќајни  знаци, патоказни и дополнителни табли со различни димензии, гумени лежечки полицајци, браници за заштита, сообраќајни огледала и тактилни плочи за слепи лица.  Станува збор за јавна набавка откако  општината деновиве склучи договор со скопската фирма ,,Бојта Инг’’ која треба во рок од 30 дена од воведувањето во работа да ги заврши работите планирани во проектот „ Безбеден граѓанин – Среќен граѓанин – Уредување на режимот на сообраќај и поставување на сообраќајни знаци во Богданци “

Станува збор за проект финансиран од Швајцарската Агенција за развој и соработка (СДЦ) кој се имплементираше од Програмата за развој на Обединетите нации (УНДП) а го изгласаа жителите на Богданци преку одржување на форумските сесии, на кои низ еден транспарентен процес со гласање го поставија како најприоритетен од областа на безбедноста на сите жители од ова општина.

Според потпишаниот договор треба да се постават  500 сообраќајни знаци за опасност, забрана, обврска и известување, 85 дополнителни табли, 130 патоказни табли. На две локации ќе бидат поставени сообраќајни огледала а на 9 места ќе има гумени ,,лежечки полицајци’’. Договорот предвидува и нивелирање на пешачки премини, набавка и поставување на браници кои ќе спречат директно претрчување на деца на улица а се планираат да бидат поставени и бетонски тактилни плочи за слепи лица од антилизгачки својства за водење и насочување но и за предупредување на ова категорија на лица

Договорот за набавка на работи за уредување на режимот на сообраќај и поставување на сообраќајни знаци (вертикална и хоризонтална сообраќајна сигнализација) во Богданци изнесува околу 41 илјади евра.

 

 

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.