Вакцинираните не се полни со токсини!

69

Студија што не е рецензирана и е демантирана од многу истражувачи се пласира како доказ дека со вакцините во телото се внесуваат токсини. Станува збор за невистинита вест, т.е. дезинформација

Рецензираме објава на Фејсбук на тема широко распространета во антивакциналните делувања и во земјава и во светот. Тврдењето е дека кога ќе ја примите мРНК вакцината против ковид (Фајзер или Модерна) тогаш во Вашето тело таа нема да остане само во рамото каде е настанато боцкањето, туку овој спајк протеин ќе отпатува во сите органи од телото и ќе предизвика штети.

Во постот се наведува следното:

Сегa сфaтиле кутрите !
Пелцованиве биле пуни сo тoксни ! Тaкa велaт нaјнoвите истржувaњa
Под ваквата објава е прикачена е информација од блог во кој се наведува за истражување на канадски професор.

Ова тврдење е невистинито и потекна од погрешните толкувања на професор од Канада, доктор Бириам Бридл. Тој рече дека ,,направена е огромна грешка”:

Спајк протеинот циркулира во крвта на индивидуите неколку дена по вакцинацијата. Кога ќе стигне во циркулацијата се акумулира на повеќе ткива како слезинката, коскената срцевина, црниот дроб, во високи концентрации се акумулира на јајниците. Во публикација, штотуку прифатена за објавување, се кажува дека кај 13 вакцинирани млади здравствени работници со Модерна, во нивната крв и циркулација е најден спајк протеинот. Долго време знаевме дека спајк протеинот е токсин што е штетен и може да предизвика штета ако влезе во циркулацијата. Сега имаме докази дека вакцините што прават нашето тело да произведе спајк протеин, односно вакцината и протеинот потоа влегува во циркулација. Тој спајк протеин потоа се врзува за клетките и може да предизвика тромбови или крварење”вели д-р Бридл во своето излагање.

Има многу причини зошто ова тврдење не е вистинито, а демантирано е од многу колеги на Бридл ширум светот. Сепак, оваа дезинформација е широко распространета и во различни форми уште го наоѓа своето место на социјалните мрежи.

Демантиран и од д-р Даниловски

Професорот на Медицинскиот факултет доктор Драган Даниловски за „Вистиномер“ објасни дека воопшто преку вакцината не влегува материјален ентитет, односно спајк протеин во организмот.
Инструкцијата за неговото производство во форма на мРНК, доаѓа само во цитоплазмата односно рибозомот, а не во јадрото на нашите клетки. И тој спајк протеин што ќе го произведе клетката, (рибозомот, т.н. фабрика за протеини), воопшто не е ист со оној на вирусот. Автоматски не ги поседува ниту својствата на оригиналниот спајк протеин. Тој само „личи“ на оригиналниот и има само антигено својство – да провоцира имун одговор. Дури и кога би бил сосема идентичен со оригиналниот спајк протеин (а не е), овој што се произведува со давање на вакцината е во 100.000 пати помала концентрација од онаа што ја произведува вирусот самиот, потребна да направи штета, објасни проф. Даниловски.

Значи, спајк протеинот што се создава во телото по вакцинација не е ист со спајк протеинот на оригиналниот корона вирус, а и кога би бил, овој од вакцината е во исклучително мали дози, невозможни да предизвикаат штета!

И во светот повеќе медицински ескперти опишаа дека има разлика меѓу спајк протеинот на корона вирусот и протеинот што се произведува во организмот после вакцинација. Тоа објаснува зошто спајк протеинот после вакцинација не може да нанесе штета.

Доктор Давид Горски, на пример, во детали објаснува дека вакцината против ковид-19 може да штити не само од инфекција со Сарс Ков 2, туку и против повреди од спајк протеинот!

мРНК или аденовирусот од вакцината не се дистрибуира екстензивно, затоа што инјекцијата се дава во мускулот на рамото. Спајк протеинот е многу веројатно дека нема да биде во концентрации ни од далеку слични на тие што се создаваат во моделите од експериментите. Спајк протеинот од вакцината не се закачува за вирусната честичка, туку си постои како единечна протеинска молекула. И на тоа додадете го фактот дека модифицираната мРНК во вакцината не се задржува многу долго во телото и не генерира спајк протеин долго време, пишува д-р Горски.

Според него, антиваксерите тврдат дека вакцините се опасни за тие што ги примаат, на начин што земаат делови од научни истражувања и ги модифицираат или интерпретираат на погрешен начин.

Важно е каде таргетира вирусот. Локацијата е многу важна. Главната инфекција почнува во белите дробови каде што се наоѓа најголемата концентрација на вирусот и затоа спајк протеинот таму ќе биде очекувано да е најмногу присутен во случаи на вистинска инфекција. Во случајот со вакцината, локацијата е мускулот на рамото и било кој спајк протеин кој би ,,избегал” од оваа локација брзо би се разложил во крвотокот во многу мало количество. Вакцината на Модерна е дистрибуирана во четврт милијарда (250 милиони) дози само во САД и да беше опасна ќе имаше сигнал за нејзината безбедност досега. Доколку шилестите протеини во крвотокот во концентрација од десетици пикограми на милилитар беа токсични, ќе имаше безбедносен сигнал после толку дадени дозидодава тој.

Доктор Едвард Ниренберг демонстрира дека количината на спајк протеин која што ја создаваат Вашите клетки после вакцинацијата е 100 илјади пати помала од нивото на спајк протеин во вирусот, кој предизвикува штета. Исто така, овој спајк протеин, создаден од вашите клетки, не е истиот како вирусниот спајк протеин!

Со него се согласува и доктор Ури Манор кој ја потврдува безбедноста на мРНК вакцините. И Владата на Канада објаснува дека мРНК вакцините не се опасни и дека спајк протеините создадени по вакцинацијата нудат двојно ниво на заштита.

Освен тоа, сите податоци за кои Бридл тврди дека ги открил од јапонска регулаторна агенција, се јавно достапни со месеци! Целата студија е објавена овде. Истата студија е цитирана дури и од ЕМА Европската агенција за лекови во февруари! Не постојат peer reviewed, односно рецензирани научни студии коишто ги поддржуваат тврдењата на Бридл.

Содржината од вакцината не се пренесува кај доилките

Бридл во видеото, исто така, тврди, дека постои ризик за доенчињата ако мајка им се вакцинира, зашто спајк протеинот можел да влезе во нивното тело преку мајчиното млеко. Но, оваа студија од 2021 година покажува дека вакцината не се пренесува преку мајчино млеко.

И оваа студија, исто така, од 2021 година, покажува дека вакцината не се пренесува во мајчиното млеко и дека вакцинираните жени не продуцирале имун одговор на протеините присутни во раните фази на бременоста. И, да биде ситуацијата уште појасна, Академијата за медицина на доење не препорачува жените што се вакцинирани да престанат да ги дојат своите бебиња.

Студијата, што ја цитира докторот Бридл во своето контроверзно интервју, е спроведена на глувци, а не на луѓе. Иако Бридл се обидува да дезинформира дека експериментите во студијата мереле концентрација и акумулација на спајк протеин, тие, всушност, мереле концентрација на липидни честички!

Спајк протенот, што вашите клетки го продуцираат по вакцинацијата, не е ист како спајк протеинот на вакцините. Тој беше модифициран за да остане закачен на површината на клетките (за да не циркулира слободно низ крвотокот) и беше дополнително деактивиран за да се спречи и дополнителното негово врзување со АCE2 рецепторите. Плус, концентрацијата на спајк протеинот креиран од Вашите клетки е 100 илјади пати помала отколку концентрацијата на вирусниот спајк протеин којшто предизвикува штети.

Слични сознанија изнесоа и проверувачите на факти на USA Today. 

Имено, за време на интервјуто кое е цитирано во постот што го рецензираме, доктор Бридл цитираше две нешта: студија која што била прифатена за рецензија во медицинскиот журнал Клинички инфективни болести и документ за Фајзеровата коронавирус вакцина. Но, ниту еден од овие извори не ги поткрепуваат неговите тврдења.

Бридл тврди во интервјуто дека студија покажала оти спајк протеините продуцирани по ковид вакцинацијата може да останат во крвотокот и да предизвикаат кардиоваскуларни штети. Авторот на таа студија го тврди спротивното.

Оваа студија мерела протеини во плазмата на 13 учесници кои примиле две дози на вакцината од Модерна. Студијата открила дека спајк протенинот бил детектиран во 3 од 13 учесници просечно 15 дена по првата доза. Но, овие резултати не кажуваат дека ковид вакцините се опасни, туку дека функционираат онака како што се дизајнирани. Хипотезата на авторите е дека ова може да е поради реакцијата на имуниот систем. За време на овој процес, Т клетките ги убиваат другите клетки кои го презентираат спајк протеинот, формирајќи дополнително испуштање на спајк во крвотокот, пишува реномираниот американски весник.

Тој погрешно ги интерпретира нашите резултати. Нашата студија едноставно валидираше дека мРНА вакцината е пренесена во протеинот за кој што е дизајнирана да го енкодира. Бидејќи нашиот метод е 100 до 1000 пати поосетлив од другите, детектиравме многу ниски концентрации на протеинот кај повеќето вакцинирани индивидуи. Иако е точно дека спајк протеинот има потенцијал да создаде негативни ефекти, знаеме со сигурност дека не ги создава тие негативни ефекти и неговото ниво е исклучително ниско во крвта, сугерирајќи дека ова не треба да предизвикува загриженост, вели Дејвид Валт, професор на медицинското училиште на Харвард и коавтор на студијата, за USA Today.

И компанијата „Фајзер“ тврди дека студијата не е ,,откриена” туку е јавно достапна.

Документот е чест технички документ, којшто е дел од поднесувањето на нашите податоци за преглед. Документот е за фармако-кинетичките согледувања, откриени во лабораториски услови и може да потврдиме дека не е за спајк протеин од вакцините кој предизвикува опасни токсини што се таложат во телото.

Демантиран и од сопствените колеги на Универзитетот

И самите колеги на Бридл од универзитетот каде работи, велат дека неговите тврдења се погрешни.

Крајниот заклучок е дека вакцината содржи изменет протеин, кој е дизајниран за да превенира целосна активација и циркулира краток период на нивоа кои се многу пониски од оние што би биле загрижувачки, изјави В. Глен Пејл, професор на Oдделот за биомедицнски науки.

„Вистиномер“ во неколку наврати има пишувано за оваа конкретна студија. Поради сите овие опсежни излагања на медицински професионалци, оваа Фејсбук објава што ја рецензиравме, ја оценуваме како дезинформација.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.