Омикрон не е лага, туку потврдена варијанта на коронавирусот во 63 земји во светот

222

Наспроти невистините што ги шири оваа објава на Фејсбук, во Африка не само што има утврдено присуство на коронавирусот, туку од ковид-19, според податоците од СЗО,  досега заболеле 6. 564.819 милиони луѓе, а починале 153.808 лица. Официјалните податоци покажуваат дека процентот на вакцинирани во Африка е многу низок и изнесува 7,3 отсто и таму досега целосно се вакцинирани околу 101 милион луѓе. Новата варијанта на коронавирусот – омикрон, беше пријавена до СЗО на 24 ноември, а за првпат беше откриена кај примероците собрани на 11 ноември во Боцвана. Европскиот центар за превенција и контрола на болести објави дека до 11 декември, во Европа се пријавени вкупно 766 потврдени случаи на  омикрон

Пост на Фејсбук тврди:

Новата мутација омикрон е ЛАГА!!

играта продолжува!!

Медиумите и платеничките портали низ светот се тие кои ја шират лажната вест и сеат паника и страв!

Во Африка има 5% вакцинирани а тамошните власти лажат дека се 30%!

Во Африка нема Ковид-19 а НЕ па нова мутација!!

Омиркон е ЛАГА!! ШИРЕТЕ ЈА ИНФОРМАЦИЈАТА!!

Постот со секоја нова реченица реди дезинформација по дезинформација, во обид да докаже дека најновата варијанта на коронавирусот, која беше откриена во Јужна Африка, не постои бидејќи на африканскиот континент нема ковид.

Во Африка нема Ковид-19 а НЕ па нова мутација!!, пишува во постот кој има 55 допаѓања и е споделен 14 пати.

Во Африка не само што има утврдено присуство на коронавирусот, туку од ковид-19, според податоците од Светската здравствена организација (СЗО), каде се сумираат бројките од цел свет, досега починале 153.808 луѓе (состојба 13.12.2021). Во 54-те земји од африканскиот континент, каде живее 16 отсто од светското население, од почетокот на пандемијата па заклучно со 13 декември 2021 година, заболеле 6. 564.819 милиони луѓе.

Само за 24 часа (07.12.2021) потврдени се нови 29.210 нови потврдени случаи од 29 земји и 143 нови смртни случаи од 16 земји. Јужна Африка, земјата каде за првпат беше откриен новиот сој омикрон, за кој е докажано дека брзо се шири, е на прво место на листата по број на зболени за 24 часа (нови 13.147 случаи).

Постот, исто така, тврди:

Во Африка има 5% вакцинирани а тамошните власти лажат дека се 30%!

 Процентот на вакцинирани во Африка е многу низок и изнесува 7,3 отсто и досега околу 101 милион луѓе во Африка се целосно вакцинирани, заклучно со 2 декмеври 2021 година. Ова се официјални податоци, кои ги пријавуваат државите до Светската здравствена организација. За споредба, 68 отсто од луѓето во Велика Британија се целосно вакцинирани; 58 отсто во САД и 67 отсто во Европската Унија.

Како заклучок, Фејсбук постот завршува:

Омиркон е ЛАГА!! ШИРЕТЕ ЈА ИНФОРМАЦИЈАТА!!

Како што веќе пишуваше „Вистиномер“, новата варијанта на САРС Ков-2, B.1.1.529 – омикрон, беше пријавена до Светската здравствена организација (СЗО) на 24 ноември 2021 година. Оваа нова варијанта првпат беше откриена кај примероците собрани на 11 ноември 2021 година во Боцвана и на 14 ноември 2021 година во Јужна Африка, објави американскиот Центар за контрола и превенција на болести.

Европскиот центар за превенција и контрола на болести објави дека до 11 декември 2021 година, во Европа се пријавени вкупно 766 потврдени случаи на новата варијанта на корона вирусот SARS-CoV-2 Omicron VOC.

Потврдени случаи на омикрон има во: Австрија (17), Белгија (30), Хрватска (3), Кипар (3), Чешка (5), Данска (195), Естонија (15), Финска (20), Франција (59), Германија (82), Грција (3), Исланд (20), Ирска (6), Италија (13), Латвија (5), Лихтенштајн (1), Холандија (62), Норвешка (109), Португалија (49), Романија (7) , Словачка (3) Шпанија (36) и Шведска (23), според информациите од официјални извори. Во неколку земји се пријавени и голем број веројатни случаи.

Кај нас сè уште нема утврдно присуство на омикрон, поради тоа што издвојувањето на варијациите се врши повремено. Ова го потврди епидемиологот Драган Кочински од Институтот за јавно здравје, кој најави дека деновиве ќе се врши секвенционирање на новата варијанта.

Омикрон не е тестирана варијанта во ИЈЗ. При секвенционирањето на 48 материјали во изминатиот месец, кај сите беше присутен сојот делта. Овој месец ќе се секвенционира омикрон варијантата, објасни епидемиологот Кочински во онлајн разговорот со новинарите.

Новиот омикрон сој, чие присуство е потврдено во 63 земји од светот, ги загрижи претставниците на СЗО. Михаела Хегерман Линдеркрон, техничка секретарка во канцларијата на СЗО за Европа, рече дека Европскиот континент станува територијата каде се шири новата варијанта за која малку се знае. За седум дена починале 29.000 европејци, а заразата се шири и поради честото мешање на луѓето, делта сојот, но и невакцинираните кои се подложни на вирусот.

Со доаѓањето на зимскиот период, луѓето сè повеќе се во затворен простор. Населението се опушти и не се придржуваат до мерките. Уште не знаеме за тежината на болеста и за тоа колку вакцините се ефективни против оваа варијанта, но наредните недели ќе имаме повеќе информации – рече Хегерман Линдеркрон.

Придржувањето кон мерките и вакцинацијата остануваат најсигурна одбрана од коронавирусот, вклучувајќи ги и последните варијации, како делта и омикрон, кои се покажаа како високо преносливи.

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.