Постот произволно тврди дека Русите го враќаат Харков, а Украинците ги напуштаат позициите

70

Постот има ударна и драматична најава, но не нуди потврдени и издржани информации. Кога е војна во прашање, добро е да се земаат предвид официјални информации и извори. Тоа во случајов го немаме. Ситуацијата на терен, од официјалните извештаи во медиумите, покажува Украинците не се повлекле од Харков. Тоа го сториле Русите на почетокот на септември, но овој град и натаму е цел на руски напади и гранатирања

Пост на Фејсбук тврди дека шири неосновани и непоткрепени информации за војната во Украина.

Русите го враќаат Харков! Украинците бегаат, го фрлаат ооружјето и ги напуштаат позициите, се вели во постот кој го анализираме.

Тој споделува и напис со иста таква драматична најава. Но, кога ќе го отворите текстот ќе видите дека во него нема ништо за тоа декка Русите го освојуваат Харков, а уште помалку дека Украинците бегале и го оставале оружјето. Во текстот има само две нејасни реченици.

Нашите војници повторно ги освоија позициите на милитантите на UAF во насока Лиман.

Фатен под силен оган од нашите трупи и сфаќајќи ја безнадежноста на нивната ситуација, непријателот се повлече, напуштајќи го своето оружје.

Ова е целиот текст кој би требало да понуди информации за ударниот наслов кој очигледно имал за цел само да привлече кликови, а не и да информира. Од првата реченица е нејасно за чии војници станува збор, дали за руски или украински. Исто така, нејасно е на кој непријател се мисли во вториот дел од реченицата.

Последните вести поврзани со Лиман се оние од почетокот на октомври, дека Русија ги повлекла војниците откако украинската армија влегла во градот.

Како што тогаш објави Гардијан, украинските воени сили го ослободија градот Лиман во Донецкиот регион, а руските власти потврдија дека ги повлекле своите трупи од ова стратешки важно населено место.

Што се однесува до Харков, на почетокот на септември, руското Министерство за одбрана соопшти дека ги повлекува силите од две области во украинската област Харков, каде што украинската контраофанзива постигна значителен напредок. Портпаролот на Министерството за одбрана Игор Конашенков изјави дека војниците ќе бидат прегрупирани од областите Балаклија и Изјум во регионот на Доњецк.

Русите продолжуваат со гранатирање на Харков, но никаде нема вест дека Украинците се повлекуваат и го фрлаат оружјето како што се тврди во постот.

Постот има ударна и малку драматична најава, но не нуди потврдени и издржани информации. Кога е војна во прашање, добро е да се земаат предвид официјални информации и извори. Тоа во случајов го немаме. Ситуацијата на терен, од официјалните извештаи во медиумите, покажува Украинците не се повлекле од Харков. Тоа го сториле Русите на почетокот на септември, но овој град и натаму е цел на руски напади и гранатирања.

Според тоа, постот што го анализираме го оценуваме како невистинит.

 


Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.