Петровска негира дека имала проблем да обезбеди војници за борбените групи на НАТО во Романија и Бугарија

45

За изнесените тврдења во објавата, дека имало притисок од НАТО офицери на САД врз министерката за одбрана, Славјанка Петровска поради тоа што наводно не можела да обезбеди илјада војници од АРМ да се вклучат во Бугарија и Романија, не се посочува ниту еден извор, ниту, нечија изјава, ниту, пак, поблиску се лоцира од каде потекнува оваа (дез)информација. Министерката Петровска во изјава за Вистиномер ги отфрли ваквите тврдења

 

Рецензираме пост објавен на социјалната мрежа Фејсбук во кој се вели:

Ексклузивно!!!! Министерката за одбрана Славјанка, деновиве се нашла под канонада од НАТО офицери на САД, заради неспособноста да обезбеди 1000 војници кои треба да бидат упатени во Бугарија и Романија до средината на ноември најдоцна. 
Имено, таа имала проблеми со обезбедување на бројката бидејќи многу професионални војници од кадарот на АРМ не сакале да се најдат на списокот. Многумина од нив се упатиле на боледување а се шпекулира дека не мал број од нив ги депонирале своите откази од работните места.
 Оние што се согласиле не ги задоволуваат критериумите на НАТО бидејќи воената алијанса барала изричито професионалци со искуство од Ирак и Авганистан. 
Паниката кај војниците од АРМ настанала откако дознале за пристапувањето на десантната елитна единица на САД Screaming Eagles во Романија, чии претставници јавно изјавиле дека се спремни за влез на украинска територија што дефакто значи отпочнување воен судир со руската армија. 
Конфликтот е се поизвесен, таргет се Молдавија и Романија, а детали ќе кажам во вечерашната емисија.

За изнесените наводи во објавата, дека наводно имало притисок од НАТО офицери на САД врз министерката за одбрана поради тоа што, наводно, не можела да обезбеди илјада војници од АРМ да се вклучат во Бугарија и Романија, не се посочува ниту еден извор, ниту, нечија изјава, ниту пак, поблиску се лоцира од каде потекнува ова тврдење. На 6 септември 2022 година, Владата на одржаната 79-та седница на предлгог на Министерството за одбрана, по презентираните информации за потребата од испраќање на припадници на Армијата на Република Северна Македонија за учество во борбената група на НАТО во Република Бугарија и во Република Романија, донесе одделни одлуки за испраќање на армиски единици во двете земји.

Задача на борбената група на НАТО е, како дел од зголемените активности за будност на НАТО (NATO enhanced Vigilance Activities- NATO eVA), да ја засили одбраната за источните граници на НАТО во Република Бугарија и во Република Романија.

Реализацијата на активностите го зајакнува партнерството и соработката помеѓу Република Северна Македонија и останатите сојузници во рамките на НАТО и истовремено влијае и на проширувањето на билатералната соработка на Република Северна Македонија со Република Бугарија, со Република Романија, со Соединетите Американски Држави, како и останатите сојузници и останатите нации, кои ќе придонесуваат во борбената група со персонал и опрема, информираа од Владата на 9 септември годинава.

Вистиномер се обрати до министерката за одбрана Славјанка Петровска во врска со наводите од постот што го рецензираме со прашање, дали тие се вистинити.

Неточно од почеток до крај. Најмногу навредува коментарот дека војниците „бегале“ на боледување. Изминатиов период бев и сум предмет на напади од луѓе на кои не им се допаѓа мојот став со поддршка на Украина и не им се лутам, ама огорчена сум од навредите упатени кон припадниците на Армијата дека бегаат. Армијата е гордост за оваа држава и јас сум горда на нивните успеси, ни рече Петровска.

Запрашана дали има проблеми во смисла на тоа да не може да се обезбедат капацитети односно доволно војници од земјава кои треба да бидат упатени во Романија и во Бугарија, Петровска изјави:

Во процес е селекцијата, листите кои треба да произлезат од таа селекција сè уште не се доставени до мене на одобрување. Вчера имав работен состанок со началникот на Генералштабот и ми потврди дека селекцијата е во тек и не ми посочи дека има каков било проблем.

Во меѓувреме, селекцијата заврши, а медиумите веќе и објавија дека се избрани 30-мината војници, кои ќе учествуваат во оваа активност. Значи, не станува збор за 1.000 војници, како што неточно се вели во рецензирнаиот пост, туку само за 30. Тие се избрани по пат на доброволно пријавување, значи дека немало никаква потреба „многумина“ да се упатуваат на било какви боледувања, ниту, пак, да депонираат оставки, како што, исто така, неточни се вели во постот. А, особено, пак, немало било каква паника, зашто упаничено лице не се пријавува да прави нешто, што е причина за неговата наводна паника. Уште една дезинформација, како и сите други.

Поради сите горенаведени факти оценуваме дека не е точно изнесеното во постот, што е предмет на оваа рецензија.


Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.