МОН: Заврши дијалогот за унапредување на средното стручно образование

120

Со денешните посети на Струмица и Валандово, заврши дијалогот за унапредување на средното стручно образование „Учи паметно, работи стручно“, но остануваме во постојана комуникација со општините и средните стручни училишта со намера да креираме нови уписни политики кои ќе бидат во интерес и на учениците и на бизнис заедницата.

Ова го истакна министерот за образование и наука Јетон Шаќири, напоменувајќи дека целта на овие средби е низ конструктивен разговор да се согледа потребата од одредени струки и профили кои недостасуваат во земјата, но и да се преземат конкретни активности за можноста за нивно оформување во дуални паралелки, уште од идната учебна 2022/23 година.

– Како резултат на овие разговори минатата година во Валандовскиот регион, Богданци и Гевгелија се отворени вкупно 9 дуални паралелки, од кои 2 се во Валандово, 5 во Гевгелија и 2 во Богданци. Во Струмица оваа учебна година беа отворени три дуални паралелки, и една во Радовиш, изјави Шаќири, потенцирајќи дека дијалогот е од исклучителна важност не само за учениците, компаниите и локалните самоуправи, туку и за целокупниот раст и развој на државата, бидејќи со овој процес, како што рече, ја обезбедуваме потребната работна сила која е дефицитарна во земјава, а која е еден од најважните фактори за напредок.

Истовремено, додаде тој, ова е одлична можност да ја зголемиме вработливоста на младите веднаш по завршувањето на школувањето, но и да ги поттикнеме своето образование да го продолжат на некој од техничките факултети.

Заблагодарувајќи се на Амбасадата на Швајцарија која го поддржува овој процес, Шаќири рече дека досега се воспоставени 97 дуални паралелки на ниво на држава што ја покажува силната волја заеднички и одговорно да го прилагодуваме образованието на современите потреби на пазарот на труд и ја враќаме атрактивноста и вредноста на средното стручно образование.

Како поттик за деветтоодделенците, кои размислуваат каде да го продолжат своето образование, МОН целосно ги промени и политиките за стипендирање. Од оваа учебна година, секој запишан ученик во дуална паралека добива месечна стипендија од 3.500 денари.

Крадењето авторски текстови е казниво со закон. Преземање авторски текстови и фотографии од ©DRNKA.MK е дозволено само делумно и со ставање хиперлинк до содржината што се цитира.